¹ И в лето тридесять осмое царства асина, взыде вааса царь израилев на иуду и стенами укрепи раму, да не даст входа и исхода асе царю иудину. ² И взя аса сребро и злато от сокровищ дому Господня и дому царева, и посла ко (венададу) сыну адера царя сирска, живущему в дамасце, глаголя: ³ положи завет между мною и тобою и между отцем моим и отцем твоим: се послах тебе сребро и злато: прииди и отжени от мене ваасу царя израилева, и да отидет от мене. ⁴ И послуша сын адеров царя асы и посла началники воев своих на грады израилевы, и порази аинона и дана, и авелмаина и вся окрестная неффалимля. ⁵ И бысть егда услыша вааса царь израилев, остави ктому созидати раму и остави дело свое. ⁶ Аса же царь взя всего иуду и взя камение от рамы и лес ея, яже на создание уготова вааса, и созда из них гаваю и масфу. ⁷ И во время оно прииде ананий пророк ко асе царю иудину и рече ему: понеже имел еси упование на царя сирска, а не уповал еси на Господа Бога твоего, того ради спасеся сила царя сирскаго от руку твоею: ⁸ не ефиопи ли и ливиане бяху на тя в силе мнозе, в дерзости колесниц и конник во множество зело? и егда уповал еси на Господа, предаде их в руку твою: ⁹ очи бо Господни назирают всю землю, еже укрепити сущих сердцем совершенным к нему: буе сотворил еси сие, (сего ради) отныне будет на тя брань. ¹⁰ Разгневася же аса на пророка и всади его в темницу, понеже прогневася о сем: и уби аса от людий во время то (многих). ¹¹ И се, словеса асы, первая и последняя, писана суть в книзе царей иудиных и израиля. ¹² И разболеся аса в лето тридесять девятое царства своего ногама, болезнию зелнейшею: и ниже в немощи своей взыска Господа, но врачев. ¹³ успе же аса со отцы своими, и умре в лето четыредесять первое царства своего: ¹⁴ и погребоша его во гробе, егоже ископа себе во граде давидове, и положиша его на одре, и наполниша ароматами и родами миров благоуханных, и сотвориша ему погребение велико зело.