¹ Филистими же воеваша противу израиля, и бежаша мужие израилевы от лица иноплеменническа и падоша ранени на горе гелвуи. ² И погнаша иноплеменницы вслед саула и вслед сынов его: и убиша иноплеменницы ионафана и аминадава и мелхисуа, сынов сауловых. ³ И отягчися брань на саула, и обретоша его стрелцы в луках и в трудех, и изнеможе от стрел. ⁴ И рече саул к носящему оружие его: извлецы мечь твой и прободи мя им, да не когда приидут необрезаннии сии и поругаются мне. И не восхоте носяй оружие его, яко убояся зело. И взя саул мечь и нападе нань. ⁵ И виде носяй оружие его, яко умре саул, и нападе и он на мечь свой и умре. ⁶ И умре саул и три сына его в день он: и весь дом его купно умре. ⁷ И видеша вси мужие израилевы, иже во юдоли, яко побежа израиль, и яко умре саул и сынове его, и оставиша грады своя и побегоша: и приидоша иноплеменницы и вселишася в них. ⁸ И бысть заутра, и приидоша иноплеменницы совлачати падших корысти, и обретоша саула и сынов его падших на горе гелвуи: ⁹ и обнажиша его, и взяша главу его и оружие его, и послаша в землю иноплеменничу, да обносится (и покажется) идолом их и людем: ¹⁰ оружия же их положиша в капищи бога своего: и главу его поткнуша в капищи дагонове. ¹¹ И услышаша вси живущии во иависе галаадстем вся, яже филистими сотвориша саулу и сыном его и израилю: ¹² и восташа от галаада вси мужие крепцыи, и приидоша и взяша труп саулов и труп сынов его, и принесоша их во иавис, и погребоша кости их под дубом во иависе: и постишася седмь дний. ¹³ И умре саул за беззакония своя, имиже беззаконнова Господеви по словеси Господню, понеже не сохрани, яко вопроси саул волшебницы еже вопросити, и отвеща ему самуил пророк. ¹⁴ И не взыска Господа саул: сего ради уби его и возврати царство его давиду сыну иессееву.