¹ И бысть в лето девятое царства его, в месяц десятый, прииде навуходоносор царь вавилонский и вся сила его на Иерусалим: и обступи его отвсюду, и создаша окрест его бойницы. ² И бысть град во облежении до первагонадесять лета царства седекиина, девятаго дне месяца: ³ и превозможе во граде глад, и не бысть хлеба людем земли тоя: ⁴ и разседеся град, и вси мужие воинстии изыдоша нощию путем врат, яже посреде стен, яже суть у вертограда царева, и халдее окрест града (беша). И побеже (царь седекиа) путем пустынным: ⁵ и погна сила халдейская вслед царя, и яша его во аравофе иерихонстем, и вся сила его разсыпася от него: ⁶ и пояша царя и поведоша его к царю вавилонску в ревлафу: и глагола с ним суд: ⁷ и сыны седекиины закла пред очима его, и очи седекиины избоде, и связа его узами, и отведе его во вавилон. ⁸ В месяц же пятый, в седмый день месяца, сие лето девятоенадесять навуходоносора царя вавилонска, прииде навузардан архимагир, раб царя вавилонскаго, во Иерусалим ⁹ и зажже храм Господень и дом царев, и вся домы Иерусалимли и вся домы великия сожже архимагир: ¹⁰ и стены Иерусалимли окрест раскопа сила халдейская. ¹¹ И останок людий избывших во граде и впадших, иже отпадоша ко царю вавилонску, и прочее и утверждение пренесе навузардан воевода. ¹² И от нищих земли тоя остави архимагир винограды блюсти и вертограды. ¹³ И столпы медяны в храме Господни, и подставы, и море медное сущее во храме Господни сокрушиша халдее, и взяша медь их во вавилон: ¹⁴ и конобы, и котлы и фиалы, и кадилницы, и вся сосуды медяныя, в нихже служаху, взяша: ¹⁵ и кадилницы, и фиалы златыя и сребряныя взя архимагир, ¹⁶ столпы два, и моря едино, и подставы, яже сотвори соломон храму Господню: не бе веса меди всех сосудов. ¹⁷ Осминадесяти лакот бысть высота столпа единаго, и глава медяна на нем: и высота главе три лакти, и на главе мрежи и шипки окрест, вся медяна: по сему же и столп вторый со мрежею. ¹⁸ И поят архимагир сареа жерца перваго и софонию жерца втораго, и три стражы вратныя: ¹⁹ и от града взя скопца единаго, иже бе приставник над мужи военными, и пять мужей предстоящих пред лицем царевым, обретшихся во граде, и книгочиа князя силы, иже строяше люди земли тоя, и шестьдесят мужей людий земли тоя обретшихся во граде: ²⁰ и поят я навузардан архимагир, и приведе я к царю вавилонскому в ревлафу. ²¹ И порази их царь вавилонский, и умори я в ревлафе, в земли емафове. И преселися иуда свыше земли своея. ²² И людие оставшиися в земли иудове, ихже остави навуходоносор царь вавилонский, и постави над ними годолию, сына ахикамля, сына сафаня. ²³ И услышаша вси князи силы сами и мужие их, яко постави царь вавилонский годолию, и приидоша к годолии в массифу, и исмаил сын нафаниин, и иоанан сын карифов, и сараиа сын фанамафов нетофафитский, и иезониа сын махаффов, сами и мужие их (приидоша). ²⁴ И клятся им годолиа и мужем их и рече им: не бойтеся пришествия халдеев: седите на земли и работайте царю вавилонскому, и добро будет вам. ²⁵ И бысть в месяц седмый, прииде исмаил сын нафаниин сына елисамля от семене царска, и десять мужей с ним, и порази годолию, и умре, и иудеев и халдеев, иже с ним бяху в массифе. ²⁶ И восташа вси людие, от мала и до велика, и князи сил, и внидоша во египет, яко убояшася от лица халдейска. ²⁷ И бысть в лето тридесять седмое преселения иоахина царя иудина, в дванадесятый месяц, в двадесять седмый день месяца, вознесе евилмародах царь вавилонский, в лето царства своего, главу иоахина царя иудина, и изведе его из дому темницы его, ²⁸ и глагола с ним благая, и даде престол ему свыше престолов царей, иже бяху с ним в вавилоне: ²⁹ и измени ризы его темничныя, и ядяше хлеб с ним всегда, во вся дни живота своего. ³⁰ И пища его от дому царска давана бяше, и все изобилие во дни его, во вся дни живота его.