¹ В лето двадесять седмое иеровоама царя израилева воцарися азариа сын амессии царя иудина: ² сын шестинадесяти лет бе, егда нача царствовати, и пятьдесят два лета царствова во Иерусалиме. Имя же матере его иехелиа от Иерусалима. ³ И сотвори правое пред очима Господнима по всему, елика сотвори отец его амессиа, ⁴ обаче высоких не разори: еще людие жряху и кадяху на высоких. ⁵ И коснуся Господь царя, и бысть прокажен до дне смерти своея: и царствова в дому апфусоф. И иоафам сын царев бе над домом судя людем земли тоя. ⁶ И прочая словес азарии, и вся елика сотвори, не сия ли написана в книзе словес дний царей иудиных? ⁷ И успе азариа со отцы своими, и погребоша его со отцы его во граде давидове. И воцарися иоафам сын его вместо его. ⁸ В лето тридесять осмое азарии царя иудина царствова захариа сын иеровоамль над израилем в самарии шесть месяц. ⁹ и сотвори лукавое пред очима Господнима, якоже сотвориша отцы его, не отступи от всех грехов иеровоама сына наватова, иже в грех введе израиля. ¹⁰ И востаста нань селлум сын иависов и кевлаам, и поразиста его, и умертвиста его: и воцарися селлум вместо его. ¹¹ И прочая словес захариевых, се, суть написана в книзе словес дний царей израилевых. ¹² сие слово Господне, еже глагола ко ииую, рекий: сынове четвертии сядут тебе и на престоле израилеве. И бысть тако. ¹³ И селлум сын иависов воцарися во израили: и в лето тридесять девятое азарии царя иудина, царствова селлум месяц дний в самарии. ¹⁴ И взыде манаим сын гаддиин от ферсилы, и прииде в самарию, и уби селлума сына иависова в самарии, и умертви его, и воцарися вместо его. ¹⁵ И прочая словес селлумовых, и совещание его, имже совещася, се, суть писана в книзе словес дний царей израилевых. ¹⁶ Тогда порази манаим и ферсу, и вся, яже в ней, и пределы ея от ферсы, понеже не отверзоша ему, и разби ю и всех, иже в ней, и имущих во чреве разсече. ¹⁷ В лето тридесять девятое азарии царя иудина, царствова манаим сын гаддиин над израилем десять лет в самарии, ¹⁸ и сотвори лукавое пред очима Господнима, (во вся дни своя) не отступи от всех грехов иеровоама сына наватова, иже в грех введе израиля. ¹⁹ Во дни его взыде фула царь ассирийский на землю (израилеву), и манаим даде фуле тысящу талант сребра, да будет рука его с ним, (еже укрепити царство в руку его). ²⁰ И возложи манаим дань на израиля, на всех сильных, дати царю ассирийску пятьдесят сикль сребра мужу коемуждо: и возвратися царь ассирийск, и не ста тамо в земли. ²¹ И прочая словес манаимовых, и вся елика сотвори, не се ли, сия написана в книзе словес дний царей израилевых? ²² И успе манаим со отцы своими, и воцарися факиа сын его вместо его. ²³ В лето пятьдесятое азарии царя иудина, царствова факиа сын манаимль над израилем в самарии лета два, ²⁴ и сотвори лукавое пред очима Господнима, и отступи от грехов иеровоама сына наватова, иже в грех введе израиля. ²⁵ И воста на него факей сын ромелиин, тристат его, и уби его в самарии близ дому царева, со арговом и со арием, и с ним (бяху) пятьдесят мужей от галаадитов, и умертви его, и воцарися вместо его. ²⁶ И прочая словес факиевых, и вся елика сотвори се, суть, писана в книзе словес дний царей израилевых. ²⁷ В лето пятьдесят второе азарии царя иудина, царствова факей сын ромелиин над израилем в самарии двадесять лет, ²⁸ и сотвори лукавое пред очима Господнима, не отступи от всех грехов иеровоама сына наватова, иже в грех введе израиля. ²⁹ Во дни факеа царя израилева прииде фелгаффелласар царь ассирийский, и взя аин и авелвефмааха, и аоха и кенезу, и асора и галаад и галилею, всю землю неффалимлю, и приведе я ко ассирианом. ³⁰ И воста осиа сын илы на факеа сына ромелиина, и порази его, и умертви его, и воцарися вместо его в двадесятое лето иоафама сына азариина. ³¹ И прочая словес факеевых, и вся елика сотвори, се, сия написана в книзе словес дний царей израилевых. ³² В лето второе факеа сына ромелиина царя израилева воцарися иоафам, сын азарии царя иудина: ³³ сын двадесяти пяти лет бе, егда нача царствовати, и шестьнадесять лет царствова во Иерусалиме. Имя же матере его иеруса дщи садокова. ³⁴ И сотвори правое пред очима Господнима, по всему елика сотвори отец его азариа, ³⁵ обаче высоких не разори: еще людие жряху и кадяху на высоких. Той созда двери храму Господню вышния. ³⁶ И прочая словес иоафамовых, и вся елика сотвори, не сия ли написана в книзе словес дний царей иудиных? ³⁷ Во дни оны начат Господь посылати на иуду раассона царя сирска и факеа сына ромелиина. ³⁸ И успе иоафам со отцы своими, и погребен бысть со отцы своими во граде давида отца своего. И воцарися ахаз сын его вместо его.