¹ И гофолиа мати охозиина виде, яко умре сын ея, и воста и погуби все семя царево. ² Иосавееф же дщи царя иорама, сестра охозиина, поя иоаса сына брата своего, и украде его от среды сынов царевых избиеных, того и доилицу его в клети постельней, и утаи его от лица гофолиина, и не умертвиша его: ³ и бе с нею крыемь в дому Господни шесть лет: и гофолиа бе царствующи в земли той. ⁴ И в седмое лето посла иодай жрец, и поят стоначалники хорримски и расимски, и возведе я к себе в дом Господень, и завеща им завет Господень, и закля их пред Господем: и показа им иодай сына царска, ⁵ и заповеда им, глаголя: сие слово, еже сотворите: третия часть от вас да снидет в субботу, и да стрежете стражбу дому царева во вратех, ⁶ и третия часть у дверий пути, и третия часть у врат созади протекаюшнх, и да устрежете стражбу дому: ⁷ и две части в вас, всяк исходяй в субботу, и да хранят стражбу дому Господня при цари: ⁸ и обступите царя около, кийждо оружие свое имый в руце своей, и входяй в садироф и да умрет: и будите с царем, егда входити ему и исходити. ⁹ И сотвориша стоначалницы вся, елика заповеда иодай смысленый: и поя кийждо мужы своя, и входящыя в субботу со исходяшими в субботу, и внидоша ко иодаю жерцу. ¹⁰ И даде жрец сотником копия и щиты царя давида, яже быша в дому Господни: ¹¹ и быша в руках воевод и предтекущих, и сотвориша сотницы и предходящии по всему, елико заповеда им жрец. И собра жрец Господень вся люди земли в дом Господень: и сташа предтекущии, кийждо их оружие имый в руце своей, от страны дому десныя, даже да страны дому шуия жертвенныя, и дому царева около: ¹² и изведе сына царева, и возложи на него венец (царский) и свидение, и воцари его, и помаза его. И восплескаша руками и реша: да живет царь. ¹³ И услыша гофолиа глас предтекущих людий, и вниде к народу в дом Господень, ¹⁴ и виде, и се, царь стояше на столпе по обычаю: и бяху пред царем певцы и трубы, и вси людие земли радующеся и трубяще в трубы. И раздра гофолиа ризы своя и возопи: измена, измена. ¹⁵ И заповеда иодай жрец стоначалником и властелем силы, и рече к ним: изведите ю вон из полков, и входяй вслед ея смертию да умрет от оружия: понеже рече жрец, да не умрет в дому Господни. ¹⁶ И возложиша на ню руце, и изведоша ю скопцы путем исхода коней дому царева, и умре ту. ¹⁷ И завеща иодай завет между Господем и между царем и между людьми, яко быти им в люди Господни: и между царем и между людьми. ¹⁸ И внндоша вси людие земли в дом ваалов и разбиша его, и жертвенники его и образы его сокрушиша добре, и мафана жерца ваалова убиша пред лицем жертвенников. И постави жрец властели в дому Господни, ¹⁹ и взя стоначалники, и хоррима и расима, и вся люди земли, и изведе царя от дому Господня: и внидоша путем врат предтекущих дому царева, и посадиша его на престоле цареве. ²⁰ И возрадовашася вси людие земли, и град умолче: и гофолию умертвиша мечем в дому цареве. ²¹ Сын седми лет иоас егда нача царствовати.