¹ И ахааву беша седмьдесят сынове во самарии. И написа писание ииуй и посла в самарию ко князем самарийским и к старейшинам и ко кормителем сынов ахаавлих, глаголя: ² и ныне егда приидет писание сие к вам, и с вами сынове господина вашего, и с вами колесницы и кони, и грады тверды и оружия: ³ и узрите благаго и праваго в сынех господина вашего, и поставите его на престоле отца его, и да воюете о доме господина вашего. ⁴ И убояшася зело и реша: се, два царя не возмогоста стати противу лицу его, и како мы станем? ⁵ И послаша иже над домом и иже над градом, и старейшины, и кормителе ко ииую, глаголголюще: отроцы мы твои, и елика аще речеши к нам, сотворим: не воцарим мужа, благое пред очима твоима сотворим. ⁶ И написа к ним ииуй писание второе, глаголя: аще вы мои и гласа моего вы послушаете, возмите главы мужей сынов господина вашего и принесите ко мне, якоже час утро, во иезраель. И бе сынов царевых седмьдесят мужей, сии началницы града вскормиша их. ⁷ И бысть егда прииде к ним писание, и взяша сыны царевы и заклаша их седмьдесят мужей, и возложиша главы их в кошницы и послаша их к нему во иезраель. ⁸ И прииде вестник, и возвести ему, глаголя: принесоша главы сынов царевых. И рече: положите я в два холма при вратех града до заутра. ⁹ И бысть заутра, и изыде и ста во вратех града, и рече ко всем людем: праведни вы: се, аз есмь, обратихся на господина моего и убих его: и кто порази всех сих? ¹⁰ видите убо, яко не падет от глагола Господня на землю, егоже глагола Господь на дом ахаавль: и Господь сотвори, елика глагола рукою раба своего илии. ¹¹ И изби ииуй всех оставшихся в дому ахаавли во иезраели, и вся вельможы его, и знаемыя его, и жерцы его, яко не остатися его останку. ¹² И воста и иде в самарию сам, в вефакад пастырский при пути. ¹³ И ииуй обрете братию охозии царя иудина и рече: кто вы? И реша: братия охозиины мы, и снидохом поздравити сыны царевы и сыны обладающия. ¹⁴ И рече: поимите я живы. И взяша их живых, и заклаша их в вефакаде, четыредесять два мужа: и не остави мужа от них. ¹⁵ И иде оттуду, и обрете ионадава сына рихавля на пути во сретение себе, и благослови его. И рече к нему ииуй: аще есть сердце твое с сердцем моим право, якоже сердце мое с сердцем твоим? И рече ионадав: есть. И рече ииуй: и аще есть, даждь руку твою. И даде руку свою. И возведе его к себе на колесницу ¹⁶ и рече к нему: гряди со мною и виждь, внегда ревновати мне по Господе саваофе. И посади его на колесницу свою. ¹⁷ И вниде в самарию, и изби всех оставшихся ахаавлих в самарии, дондеже истребити ему по глаголу Господню, егоже глагола ко илии. ¹⁸ И собра ииуй вся люди и рече к ним: ахаав поработа ваалу мало, ииуй же поработает ему много: ¹⁹ и ныне вся пророки вааловы, вся рабы его и жерцы его призовите ко мне, муж да не потаится, яко жертва велика ваалу: и всяк иже потаится, не будет жив. И ииуй сотвори лестию, да погубит рабы вааловы. ²⁰ И рече ииуй: освятите жертву ваалу и служение. И проповедаша. ²¹ И посла ииуй во весь израиль и рече, глаголя: и ныне вси раби вааловы, и вси жерцы его, и вси пророцы его, да никтоже останется, яко жертву велику творю: иже останется, не будет жив и приидоша вси раби вааловы, и вси жерцы его, и вси пророцы его: не остася муж, иже не прииде: и внидоша во храм ваалов, и наполнися храм ваалов от края да края. ²² И рече ииуй к сущым над домом одежд: изнесите одежды всем рабом вааловым. И изнесе им ризохранитель. ²³ И вниде ииуй и ионадав сын рихавль в храмину ваалову и рече рабом вааловым: испытайте и видите, аще есть с вами от рабов Господних, и вышлите всех рабов Господних обретшихся тамо. И бысть якоже глагола ииуй, яко не бе от рабов Господних, но токмо едини раби вааловы. ²⁴ И вниде сотворити жертвы и всесожжения и ииуй постави себе вне осмьдесят мужей и рече: муж иже аще угонзет от мужей, ихже аз извожду в руки вашя, душа его вместо души его. ²⁵ И бысть егда сконча творяй всесожжения, и рече ииуй предтекущым и тристатом: вшедше избийте их, да не изыдет от них муж. И избиша их острием меча и повергоша предтекущии и тристаты, и идоша даже до града храма ваалова: ²⁶ и изнесоша кумир ваалов и сожгоша его: ²⁷ и разбиша кумиры вааловы, и низвергоша дом ваалов, и определиша его на афедрон даже до дне сего. ²⁸ И погуби ииуй храм ваалов от израиля. ²⁹ Обаче от грехов иеровоама сына наватова, иже введе в грех израиля, не отступи ииуй от последования их: юницы златыя, яже в вефили и в дане. ³⁰ И рече Господь ко ииую: за сия, елика ублажил еси сотворити правое пред очима моима, и вся елика по сердцу моему сотворил еси дому ахаавлю, сынове твои до четвертаго рода сядут на престоле во израили. ³¹ И ииуй не сохрани ходити в законе Господни всем сердцем своим: не отступи от грехов иеровоама сына наватова, иже в грех введе израиля. ³² Во дни оны нача Господь посецати во израили: и порази их азаил во всех пределех израилевых, ³³ от иордана на восток солнца, всю землю галаадску и гаддииску, и рувимову и манассиину, от ароира, иже есть при устии потока арнонска, и галаад и васан. ³⁴ И прочая словес ииуевых, и вся яже сотвори, и вся сила его, и совещания, яже совеща, не се ли, сия написана в книзе словес дний царей израилевых? ³⁵ И успе ииуй со отцы своими, и погребоша его в самарии. И воцарися иоахаз сын его вместо его. ³⁶ И дний бяше, в няже ииуй царствова над израилем в самарии, двадесять осмь лет.