¹ И сын адеров царь сирский собра всю силу свою, и возшед обседе самарию, и с ним тридесять два царя и вси конницы и колесницы: и взыдоша, и обседоша самарию, и ратоваша на ню: ² и посла ко ахааву царю израилеву во град и рече к нему: сице глаголет сын адеров: ³ сребро твое и злато твое мое есть, и жены твоя и чада твоя добрая моя суть. ⁴ И отвеща царь израилев и рече: якоже глаголал еси, господи мой царю, твой есмь аз и вся моя. ⁵ И возвратишася послы и реша: сице глаголет сын адеров: аз посылах к тебе, глаголя: сребро и злато твое и жены твоя и чада твоя даждь мне: ⁶ яко в сей час утро послю рабы моя к тебе, и изыщут дом твой и домы отрок твоих, и будут вся желаемая очес их, на нихже аще возложат руки своя, и возмут. ⁷ И призва царь израилев вся старейшины земли и рече: знайте ныне и видите, яко той зле просит, яко присла ко мне (глаголя) о женах моих и о сынех моих и о дщерех моих: сребра моего и злата моего не возбраних ему. ⁸ И реша ему старейшины и вси людие: не послушай, ни восхощи (дати). ⁹ И рече послом сына адерова: рцыте господину вашему: вся, ихже ради посылал еси к рабу твоему прежде, сотворю, сего же глагола не могу сотворити. И отидоша мужие (адеровы) и возвестиша ему слово. ¹⁰ И паки посла к нему сын адеров, глаголя: сия да сотворят ми бози и сия да приложат, аще доволна будет персть самарии горстем всех людий пешцев моих. ¹¹ И отвеща царь израилев и рече: доволно: да не хвалится слячен, якоже прямый. ¹² И бысть егда отвеща ему слово сие, бе пиющь сам и вси царие, иже бяху с ним в кущах: и рече отроком своим: сотворите вал. И сотвориша вал над градом. ¹³ И се, пророк един прииде к ахааву царю израилеву и рече: сия глаголет Господь: видиши ли весь народ сей великий? се, аз дам его днесь в руце твои, и уразумееши, яко аз (есмь) Господь. ¹⁴ И рече ахаав: в чем? И рече: сице глаголет Господь: во отроцех князей градских. И рече ахаав: кто начнет брань? И рече: ты. ¹⁵ И сочте ахаав отроки князей градских, и бысть их двести тридесять и два: и по сих сочте люди вся сыны силы, седмь тысящ. ¹⁶ И изыде в полудне: и сын адеров пиян бе зело в сокхофе сам и царие (иже с ним), тридесять два царя помощника ему. ¹⁷ И изыдоша отроцы воевод градских в первых. И посла сын адеров, и возвестиша царю сирскому, глаголюще: мужие изыдоша из самарии. ¹⁸ И рече им: аще на мир изыдоша, поимите их живых: и аще на брань изыдоша, живых поимите их, да не исходят из града. ¹⁹ И тии изыдоша из града отроцы воевод градских, и сила вслед их. ²⁰ И порази кийждо противнаго себе, и удвои кийждо противнаго себе. И бежа сириа: и погна их израиль, и гонзе токмо сын адеров царь сирский на кони конника. ²¹ И изыде царь израилев, и взя вся кони и колесницы, и порази язвою великою в сирии. ²² И прииде пророк к царю израилеву и рече: укрепися и разумей, и виждь, что сотвориши, яко преходящу лету сему, сын адеров, царь сирийский, приидет на тя. ²³ И отроцы царя сирийска реша ему: Бог гор Бог израилев, а не Бог юдолий, сего ради укрепися паче нас: аще же сразимся с ними на равнине, истинно укрепимся паче их: ²⁴ по глаголу же сему сотвори: распусти цари коегождо на место свое, и постави вместо их воеводы, ²⁵ и пременим тебе силу вместо силы падшия у тебе, и кони вместо коней, и колесницы вместо колесниц, и сразимся с ними на равнине, и укрепимся паче их. И послуша гласа их и сотвори тако. ²⁶ И бысть минувшу лету тому, и сочте сын адеров сирию, и взыде во афеку на брань на израиля. ²⁷ И сынове израилевы сочислишася и изыдоша во сретение им. И ополчишася израилтяне противу им, аки два стада коз: сириане же наполниша землю. ²⁸ И прииде человек Божий и рече к царю израилеву: сице глаголет Господь: понеже рече сириа: Бог гор Господь Бог израилев, и не Бог юдолий той, и дам силу великую сию в руку твою, и уразумееши, яко аз Господь. ²⁹ И ополчишася тии противу им седмь дний. И бысть в день седмый, и приближися брань, и порази израиль сириан, сто и двадесять тысящ пешцев во един день. ³⁰ И бежаша оставшиися во афеку град, и паде стена на двадесять седмь тысящ мужей оставшихся: сын же адеров бежа и вниде в дом ложа, в чертог. ³¹ И реша к нему отроцы его: се, ныне вемы, яко царие дому израилева милостиви суть: да возложим ныне вретища на чресла наша и ужа на выи нашя, и изыдем ко царю израилеву, да негли оживит душы нашя. ³² И препоясашася во вретища по чреслом своим, и возложиша ужя на выи своя, и приидоша к царю израилеву и реша: раб твой сын адеров глаголет: да живет душа моя. И рече: аще есть еще жив, брат ми есть. ³³ И мужие за знак и в залог прияша слово от уст его, и реша: брат твой сын адеров. И рече: идите и приведите его. И изыде к нему сын адеров. И возведоша его к нему на колесницу. ³⁴ И рече к нему: грады, яже взя отец мой от отца твоего, отдам тебе: и на исход сотвориши я себе в дамасце, якоже положи отец мой в самарии, и аз в завете пущу тя. И положи ему завет и отпусти его. ³⁵ И человек един от сынов пророчих рече ко ближнему своему по словеси Господню: бий мя ныне. И не восхоте человек бити его. ³⁶ И рече к нему: понеже не послушал еси гласа Господня, се, ты отидеши от мене, и поразит тя лев. И отиде от него, и обрете его лев и порази его. ³⁷ И обрете человека инаго и рече: бий мя ныне. И би его человек, и поразив сокруши его. ³⁸ И иде пророк и предста царю израилеву на пути и покры покрывалом очи свои. ³⁹ И бысть егда мимоидяше царь, и сей возопи ко царю и рече: раб твой изыде на войну брани, и се, муж приведе ко мне мужа и рече ко мне: сохрани мужа сего: аще же отрешився отскочит, и будет душа твоя вместо души его, или талант отдаси сребра: ⁴⁰ и бысть яко озреся раб твой семо и овамо, и сего не бысть. И рече к нему царь израилев: се, суд твой при мне, сам себе убил еси. ⁴¹ И ускори и отя покрывало от очес своих. И позна его царь израилев, яко от пророк сей есть. ⁴² И рече к нему: тако глаголет Господь: понеже испустил еси ты мужа пагубнаго из руки твоея, и будет душа твоя вместо души его, и людие твои вместо людий его. ⁴³ И отиде царь израилев к дому своему смущен и разслаблен, и прииде в самарию.