¹ И возвести ахаав иезавели жене своей вся, елика сотвори илиа, и яко изби пророки оружием. ² И посла иезавель ко илии и рече: аще ты еси илиа, аз же иезавель: сия да сотворят ми бози и сия да приложат ми, яко в сей же час утро положу душу твою, якоже душу единаго от них. ³ И убояся илиа, и воста, и отиде души ради своея, и прииде в вирсавию землю иудину, и остави отрочище свое тамо, ⁴ сам же иде в пустыню дне путь, и прииде, и седе под смерчием, и проси души своей смерти, и рече: довлеет ныне (ми), возми убо от мене душу мою, Господи, яко несмь аз лучший отец моих. ⁵ И ляже, и успе под садом: и се, ангел Господень коснуся ему и рече ему: востани, яждь и пий. ⁶ И воззре илиа: и се, у возглавия его опреснок ячменный и чванец воды. И воста, и яде и пи, и возвратився успе. ⁷ И обратися ангел Господень вторицею, и коснуся ему, и рече ему: востани, яждь и пий, яко мног от тебе путь. ⁸ И воста, и яде и пи: и иде в крепости яди тоя четыредесять дний и четыредесять нощей до горы Божия хорив. ⁹ И вниде тамо в пещеру, и вселися в ней. И се, глагол Господень к нему и рече: что ты зде, илие? ¹⁰ И рече илиа: ревнуя поревновах по Господе (Бозе) вседержители, яко оставиша тя сынове израилевы: олтари твоя раскопаша, и пророки твоя избиша оружием, и остах аз един, и ищут души моея изяти ю. ¹¹ И рече: изыди утро и стани пред Господем в горе: и се, мимо пойдет Господь, и дух велик и крепок разоряя горы и сокрушая камение в горе пред Господем, (но) не в дусе Господь: и по дусе трус, и не в трусе Господь: ¹² и по трусе огнь, и не во огни Господь: и по огни глас хлада тонка, и тамо Господь. ¹³ И бысть яко услыша илиа, покры лице свое милотию своею, и изыде и ста пред вертепом. И се, к нему бысть глас и рече: что ты зде, илие? ¹⁴ И рече илиа: ревнуя поревновах по Господе Бозе вседержители, яко оставиша завет твой сынове израилевы, и олтари твоя раскопаша, и пророки твоя избиша оружием, и остах аз един, и ищут души моея изяти ю. ¹⁵ И рече Господь к нему: иди, возвратися путем своим, и изыдеши на путь пустыни дамасковы, и помажеши азаила на царство сирийское, ¹⁶ и ииуа сына намессиина помажеши на царство над израилем, и елиссеа сына сафатова от авелмаула помажеши вместо себе пророка: ¹⁷ и будет спасаемаго от оружия азаилева убиет ииуй, и спасаемаго от оружия ииуина убиет елиссей: ¹⁸ и оставиши во израили седмь тысящ мужей, вся колена, яже не преклониша колена ваалу, и всяка уста, яже не молишася ему. ¹⁹ И иде оттуду, и обрете елиссеа сына сафатова, и сей оряше двеманадесятьма супругома волов пред ним, и той сам по двоюнадесяти супруг. И прииде илиа к нему, и поверже милоть свою на него. ²⁰ И остави елиссей волы, и тече вслед илии, и рече: (молю тя,) да облобыжу отца моего и матерь мою, и иду вслед тебе. И рече ему илиа: иди, возвратися, яко сотворих тебе. ²¹ И возвратися от него: и взя супруги волов, и закла, и испече я в сосудех воловных, и даде людем, и ядоша. И воста, и иде вслед илии, и служаше ему.