¹ И бысть по днех мнозех, и глагол Господень бысть ко илии в лето третие глаголя: иди и явися ахааву, и дам дождь на лице земли. ² И иде илиа ко ахааву явитися, и бе глад крепок в самарии. ³ И призва ахаав авдиа строителя дому: и авдий бе бояся Господа зело. ⁴ И бысть егда нача избивати иезавель пророки Господни, и взя авдий сто мужей пророки и скры я по пятидесяти во двоих вертепех и кормяше их хлебом и водою. ⁵ И рече ахаав ко авдию: гряди, и прейдем на землю, и на источники водныя, и на вся потоки, да негли како обрящем былие и прекормим кони и мски, да не изгибнут от скот. ⁶ И разделиша себе путь ити по нему: ахаав иде путем единым един, и авдий иде путем другим един. ⁷ И бе авдий един на пути: и прииде илиа на сретение ему един. И авдий потщася, и паде на лице свое и рече: ты ли еси сам, господи мой илие? ⁸ И рече илиа ко авдию: аз есмь: иди и повеждь господину твоему, глаголя: се, илиа. ⁹ И рече авдий: что согреших аз, яко предаеши раба твоего в руце ахаавли еже умертвити мя? ¹⁰ жив Господь Бог твой, аще есть язык или царство, аможе не посла господин мой искати тебе: и реша, несть: и закля царство и страны его, яко не обрете тебе: ¹¹ и ныне ты глаголеши ми: иди, возвести господину твоему: се, илиа: ¹² и будет егда аз отиду от тебе, и дух Господень возмет тя в землю, еяже не вем, и вниду возвестити ахааву, и не обрящет тебе, и убиет мя: раб же твой есть бояйся Господа от юности своея: ¹³ или не возвестися тебе господину моему, яже сотворих, егда убиваше иезавель пророки Господни, и сокрых пророки Господни сто мужей, по пятидесяти в вертепе, и кормих их хлебом и водою? ¹⁴ и ныне ты глаголеши ми: иди, повеждь господину твоему: се, илиа: и убиет мя. ¹⁵ И рече илиа: жив Господь сил, емуже предстою пред ним, яко днесь покажуся ему. ¹⁶ И иде авдий во сретение ахааву и возвести ему. И ускори ахаав и иде во сретение илии. ¹⁷ И бысть егда узре ахаав илию, и рече ахаав ко илии: ты ли еси развращаяй израиля? ¹⁸ И рече илиа: не развращаю аз израиля, но разве ты и дом отца твоего, егда остависте вы Господа Бога вашего и идосте вслед ваала: ¹⁹ и ныне посли и собери ко мне всего израиля на гору кармилскую, и пророки студныя вааловы четыреста и пятьдесят, и пророков дубравных четыреста, ядущих трапезу иезавелину. ²⁰ И посла ахаав во весь израиль, и приведе вся пророки на гору кармилскую. ²¹ И приведе ко всем им илию, и рече им илиа: доколе вы храмлете на обе плесне вашы? аще есть Господь Бог, идите вслед его: аще же ваал есть, то идите за ним. И не отвещаша людие словесе. ²² И рече илиа к людем: аз остах пророк Господень един: и пророцы вааловы четыреста и пятьдесят мужей, и пророков дубравных четыреста. ²³ (И рече илиа:) да дадят нам два вола, и да изберут себе единаго, и да растешут и (на уды), и возложат на дрова, и да не возгнетят огня: и аз растешу вола другаго, и возложу на дрова, и огня не возгнещу: ²⁴ и да призовете имена богов ваших, и аз призову имя Господа Бога моего: и будет Бог, иже аще послушает огнем, той есть Бог. И отвещаша вси людие и реша: добр глагол (илиин), егоже глагола (да будет тако). ²⁵ И рече илиа пророком студным: изберите себе юнца единаго, и сотворите вы прежде, яко вас есть множество: и призовите имена богов ваших, и огня не возгнещайте. ²⁶ И пояша юнца, и сотвориша (тако), и призываху имя ваалово от утра до полудне, и реша: послушай нас, ваале, послушай нас. И не бе гласа, ни послушания. И ристаху около жертвенника, егоже сотвориша. ²⁷ И бысть в полудне, и поругася им илиа фесвитянин и рече: зовите гласом великим, яко бог есть, яко непраздность ему есть, и негли что ино строит, или спит сам, и востанет. ²⁸ И зовяху гласом великим, и крояхуся по обычаю своему ножами, и мнози бишася бичми, до пролития крове своея, ²⁹ и прорицаху, дондеже прейде вечер: и бысть егда прииде время взыти жертве, и не бе гласа, ниже послушания. И рече илиа фесвитянин пророком студным, глаголя: отступите ныне, да и аз сотворю жертву мою. И отступиша тии, и умолкнуша. ³⁰ И рече илиа к людем: приступите ко мне. И приступиша вси людие к нему. ³¹ И взя илиа дванадесять камений по числу колен израилевых, якоже глагола к нему Господь, глаголя: израиль будет имя твое. ³² И созда камение во имя Господне, и изцели олтарь раскопанный, и сотвори море вмещающее две меры семене окрест олтаря. ³³ И воскладе дрова на олтарь, егоже сотвори, и растеса на уды всесожегаемая, и возложи на дрова, и воскладе на олтарь. ³⁴ И рече илиа: принесите ми четыри водоносы воды, и возливайте на всесожжение и на полена. И сотвориша тако. И рече: удвойте. И удвоиша. И рече: утройте. И утроиша. ³⁵ И прохождаше вода окрест олтаря, и море исполнися воды. ³⁶ И возопи илиа на небо и рече: Господи Боже авраамов и исааков и иаковль, послушай мене, Господи, послушай мене днесь огнем, и да уразумеют вси людие сии, яко ты еси Господь един израилев, и аз раб твой, и тебе ради сотворих дела сия: ³⁷ послушай мене, Господи, послушай мене огнем, и да разумеют вси людие сии, яко ты еси (един) Господь Бог, и ты обратил еси сердца людий сих вслед тебе. ³⁸ И спаде огнь от Господа с небесе, и пояде всесожегаемая, и дрова, и воду, яже в мори, и камение и персть полиза огнь. ³⁹ И падоша вси людие на лице свое и реша: воистинну Господь Бог той есть Бог. ⁴⁰ И рече илиа к людем: поимайте пророки вааловы, да ни един скрыется от них. И яша их, и веде я илиа на поток киссов, и закла их тамо. ⁴¹ И рече илиа ко ахааву: взыди, и яждь и пий, яко глас есть дождевнаго хождения. ⁴² И взыде ахаав ясти и пити. Илиа же взыде на кармил, и преклонися на землю, и положи лице свое между коленома своима, ⁴³ и рече отрочищу своему: взыди и воззри на путь морский. И взыде, и воззре отрочищь, и рече: несть ничтоже. И рече илиа: и ты обратися седмижды. ⁴⁴ И обратися отрочищь седмижды: и бысть в седмое, и се, облак мал, аки след ноги мужеския, возносящь воду из моря. И рече: взыди и рцы ахааву: впрязи колесницу твою и сниди, да не постигнет тебе дождь. ⁴⁵ И бысть до зде и до зде, и небо примрачися облаки и духом, и бысть дождь велий. И плакася, и иде ахаав до иезраеля. ⁴⁶ И рука Господня бысть на илии, и стягне чресла своя, и тече пред ахаавом во иезраель.