¹ И во осмоенадесять лето царства иеровоама сына наватова, воцарися авиа сын ровоамль над иудою, ² и три лета царствова во Иерусалиме. Имя же матере его мааха, дщи авессаломля. ³ И хождаше во всех гресех отца своего, яже сотвори пред ним, и не бе сердце его совершено с Господем Богом его, якоже сердце давида отца его: ⁴ яко давида ради остави ему Господь Бог его останок во Иерусалиме, да возставит по нем чада его и утвердит Иерусалим, ⁵ понеже сотвори давид правое пред Господем и не уклонися от всех, яже заповеда ему вся дни живота его, кроме слова урии хеттеанина. ⁶ И брань бе между ровоамом и между иеровоамом во вся дни живота их. ⁷ И прочая словес авииных, и вся яже сотвори, не се ли, сия написана в книзе слов дний царей иудиных? И брань бе между авиею и между иеровоамом. ⁸ И успе авиа со отцы своими в двадесятое лето иеровоама, и погребоша его со отцы его во граде давидове. И воцарися аса сын его вместо его. ⁹ И в лето двадесятое иеровоама царя израилева, царствоваше аса над иудою, ¹⁰ и четыредесять и едино лето царствова во Иерусалиме. Имя же матере его ана, дщи авессаломля. ¹¹ И сотвори аса правое пред Господем, якоже давид отец его, ¹² и отя скверная от земли, и искорени вся изваянная, яже сотвориша отцы его, ¹³ и ану матерь свою отстави еже не владети ей, понеже сотвори сонмище в дубраве своей: и изсече аса гай ея и сожже огнем в потоце кедрстем: ¹⁴ высоких же не искорени, обаче сердце асы бе совершенно пред Господем во вся дни его: ¹⁵ и внесе столпы отца своего, и столпы своя внесе во храм Господень сребряны и златы, и сосуды. ¹⁶ И брань бе между асою и между ваасом царем израилевым во вся дни их. ¹⁷ И взыде вааса царь израилев на иуду и созда раму, яко не быти на исхождение и вхождение асе царю иудину. ¹⁸ И взя аса все сребро и злато обретшееся в сокровищах дому Господня и в сокровищах дому царева и даде я в руце отрок своих: и посла их царь аса ко сыну адерову сыну таверема во рамман, ко сыну азаила, царя сирскаго, живущаго в дамасце, глаголя: ¹⁹ положи завет между мною и тобою, и между отцем моим и отцем твоим: се, послах ти дары, сребро и злато: прииди, разруши завет твой, иже со ваасою царем израилевым, да отидет от мене. ²⁰ И послуша сын адеров царя асы, и посла воеводы сил своих на грады израилевы, и поразиша аина и дана, и авеля, дому маахиина, и весь хеннереф, даже до всея земли неффалимли. ²¹ И бысть яко услыша вааса, и остави созидати раму, и возвратися во ферсу. ²² Царь же аса заповеда всему иуде во енакиме, и взяша камение из рамы и древа ея, имиже основа вааса, и созда в них царь аса всяк холм вениаминь и стражбища. ²³ Прочая же словес асиных, и вся сила его, и вся яже сотвори, и грады яже созда, не се ли, сия писана суть в книзе словес дний царей иудиных? Обаче во время старости своея начат болети ногама своима: ²⁴ и успе аса со отцы своими, и погребен бысть во граде давида отца своего. И воцарися иосафат сын его вместо его. ²⁵ Нават же сын иеровоамль нача царствовати над израилем во второе лето асы царя иудина, и царствова над израилем два лета, ²⁶ и сотвори лукавое пред Господем, и хождаше путем отца своего и во гресех его, имиже согрешити сотвори израилю. ²⁷ И обседе его вааса сын ахиин в дому велаана сына ахиина, и уби его во гавафоне иноплеменничи: нават же и весь израиль обседоша гавафон. ²⁸ И умертви его вааса в лето третие асы царя иудина, и воцарися вместо его. ²⁹ И бысть егда воцарися, изби весь дом иеровоамль и не остави ничтоже от всего дыхания иеровоамля, дондеже искорени их по глаголу Господню, егоже глагола рукою раба своего ахии силонитскаго, ³⁰ грех ради иеровоамлих, иже согреши, иже введе во грех израиля, и в прогневании его, имже прогнева Господа Бога израилева. ³¹ И прочая словеса навата, и вся яже сотвори, не се ли, сия писана суть в книзе словес дний царей израилевых? ³² И бяше брань между асою (царем иудиным) и ваасою царем израилевым во вся дни их. ³³ И в третие лето асы царя иудина царствова вааса сын ахиин над всем израилем во ферсе двадесять и четыре лета, ³⁴ и сотвори лукавое пред Господем, и иде путем иеровоама сына наватова, и во гресех его, имиже в согрешение приведе израиля.