¹ И царица савска услыша имя соломоне и имя Господне, и прииде искусити его притчами: ² и прииде во Иерусалим с силою тяжкою зело: и на велблюдех привезоша ароматы и злата много зело, и камение драгое: и вниде к соломону и глагола ему вся, елика име на сердцы своем. ³ И возвести ей соломон вся глаголы ея: и не бе слово презрено от царя, егоже не возвести ей. ⁴ И виде царица савска весь смысл соломонь и дом егоже созда, ⁵ и снеди соломони, и жилища отроков его, и предстояние служащих ему, и облачение его, и виночерпцы его, и всесожжения его, яже приношаше во храме Господни, и вне себе бысть, ⁶ и рече к соломону царю: истинна суть словеса, яже слышах в земли моей, ⁷ о словесех твоих и о смысле твоем: и не ях веры глаголющым ми, дондеже приидох семо, и видеста очи мои: и се, несть ни пол того, якоже ми поведаша: приложил еси премудрость и благая к сим паче всякаго слуха, егоже слышах в земли моей: ⁸ блаженны жены твоя, блажени отроцы твои сии, иже предстоят пред тобою всегда, слышаще всякий смысл твой: ⁹ буди Господь Бог твой благословен, иже восхоте тя дати на престол израилев, понеже возлюби Господь израиля утвердити во веки и постави тя царя над ними творити суд в правде и в судбах их. ¹⁰ И даде соломону сто и двадесять талант злата, и ароматы многи зело, и камение драгое: не приидоша еще таковыя ароматы во множестве, яже даде царица савска царю соломону. ¹¹ И корабль хирамль приносящь злато из софира, (и) принесе древа нетесана многа зело, и камение драгое. ¹² И сотвори царь древом нетесаным подпоры храму Господню и дому цареву, и сопели и гусли певцем: не приидоша по сем таковая древеса нетесаная на земли, ниже видена быша где даже до дне сего. ¹³ И царь соломон даде царице савстей вся, елика восхоте и елики проси у него, кроме всех, яже даде ей рукама своима соломон царь, И возвратися, и отиде в землю свою, сама и вси отроцы ея. ¹⁴ И бе вес принесеннаго злата соломону во едино лето шесть сот и шестьдесят и шесть талант злата, ¹⁵ кроме даней от подданных и от купцов и от всех царей странных и от воевод земных. ¹⁶ И сотвори царь соломон триста копий златых кованных, по триста златых во едино копие вдела: ¹⁷ и триста щитов кованных златых, по три литры злата бяше на коемждо щите: и даде я царь во храм дубравы ливанския. ¹⁸ И сотвори царь престол от костей слоновых велий и позлати его златом искушеным: ¹⁹ шесть степеней престолу, и образы телцов престолу созади, и верх престола кругл бе созади его, и руце сюду и сюду на престоле седалища, и два льва стояща при руках, ²⁰ и дванадесять львы стояще ту на шести степенех сюду и сюду: не бяше тако во всяком царстве. ²¹ И вси сосуди, иже бяху при царе соломоне, злати беша, и умывалницы златы и вси сосуди в храме дубравы ливанския златокованны: не бяше сребра, понеже за ничто бе сребро во дни соломони: ²² корабль бо фарсийский царю соломону на мори с корабли хирамлими, единою во триех летех прихождаше цареви корабль из фарсиса и приношаше злато и сребро, и зубы слоновы, и пифики и павы, и камение точеное и тесаное. ²³ И возвеличися соломон паче всех царей земных и богатством и смыслом. ²⁴ И вси царие земстии искаху видети лице соломона, еже бы услышати смысла его, егоже даде ему Господь в сердцы его: ²⁵ и тии приношаху кийждо дары своя, и сосуды златы и сребряны, и ризы, стакти и сладкости, и кони и мски на всякое лето. ²⁶ И собра соломон колесницы и кони, и бяху соломону четыредесять тысящ кобылиц в колесницы, и дванадесять тысящ конных: и постави я во градех колесниц, а (друзии бяху) у царя во Иерусалиме: и бе властелин всем царем от реки и до земли иноплеменник и до предел египта. ²⁷ И сложи царь злато и сребро во Иерусалиме якоже камение, и кедры сложи якоже черничие, еже на поли во множестве. ²⁸ И привождаху соломону кони от египта и от фекуя купцы царстии и куповаху от фекуя променою. ²⁹ И прихождаху колесницы из египта за шесть сот сребреник, и конь за сто пятьдесят сребреник: такожде и ко всем царем хеттимским и сирийским по морю исхождаху.