¹ И собра царь соломон вся старейшины израилевы, вся начала колен, старейшины отечеств сынов израилевых к себе во сион, еже пренести кивот завета Господня от града давидова: той есть сион. ² И собрашася ко царю соломону вси людие израилевы в месяц афаним в праздник: сей есть месяц седмый. ³ И приидоша вси старейшины израилевы, и взяша иерее кивот, ⁴ и вознесоша кивот Господень, и скинию свидения, и вся сосуды святыя яже во скинии свидения: и вознесоша я иерее и левити. ⁵ Царь же соломон и весь собор израилский, собравшеся к нему, с ним пред кивотом жряху волы и овцы несочтенны, безчисленны от множества. ⁶ И внесоша иерее кивот завета Господня на место его во давир храма, во святая святых, под крила херувимов. ⁷ Херувими бо беша распростерше криле над местом кивота: и окрываху херувими над кивотом и над святыми его сверху. ⁸ И обдержаста освященая: и зряхуся главы освященных от святых к лицу давира, и не являхуся вне. ⁹ Не бе в кивоте токмо две скрижали каменны, скрижали завета, ихже положи моисей в хориве, яже завеща Господь со сынами израилевыми, внегда исходити им от земли египетския. ¹⁰ И бысть егда изыдоша иерее из святилища, и облак исполни храм Господень, ¹¹ и не можаху иерее стати служити от лица облака, яко исполни слава Господня храм. ¹² Тогда рече соломон: Господь рече еже обитати во мгле, ¹³ аз же создах дом имени твоему свят тебе и готов, и престолу твоему, еже обитати тебе в нем во веки. ¹⁴ И обрати царь лице свое и благослови царь всего израиля: весь же собор израилев стояше. ¹⁵ И рече (царь): благословен Господь Бог израилев днесь, иже глагола усты своими о давиде отце моем и рукама своима исполни, глаголя: ¹⁶ от дне в оньже изведох люди моя израиля из египта, не избрах града от всех племен израилевых на создание храму, еже быти имени моему тамо: но избрах во Иерусалиме быти имени моему тамо: и избрах давида быти ему властелину над людьми моими израилем: ¹⁷ и бысть на сердцы отцу моему давиду, еже создати храм имени Господа Бога израилева, ¹⁸ и рече Господь к давиду отцу моему: понеже взыде на сердце твое еже создати храм имени моему, добре сотворил еси, яко бысть на сердцы твоем: ¹⁹ обаче ты не созиждеши храма, но разве сын твой, иже изыде из чресл твоих, той созиждет храм имени моему: ²⁰ и возстави Господь глаголгол свой егоже глагола: и востах вместо давида отца моего, и седох на престоле израилеве, якоже глагола Господь, и создах храм имени Господа Бога израилева, ²¹ и поставих тамо место кивоту, в немже есть тамо завет Господень, егоже завеща Господь со отцы нашими во извождении их из земли египетския. ²² И ста соломон пред лицем олтаря Господня пред всем собором израилевым и воздвиже руце свои на небо, ²³ и рече: Господи Боже израилев, несть якоже ты Бог на небеси горе и на земли низу, храняй завет и милость рабу твоему ходящему пред тобою всем сердцем своим, ²⁴ яже сохранил еси рабу твоему давиду отцу моему: ибо глаголал еси усты твоими и рукама твоима совершил еси, якоже день сей: ²⁵ и ныне, Господи Боже израилев, сохрани рабу твоему давиду отцу моему, яже рекл еси ему, глаголя: не оскудеет муж от лица моего седяй на престоле израилеве, токмо аще сохранят чада твоя пути своя, еже ходити предо мною, якоже ходил еси предо мною: ²⁶ и ныне, Господи Боже израилев, да уверится глаголгол твой, егоже рекл еси давиду отцу моему: ²⁷ яко аще истинно вселится Бог с человеки на земли? аще небо и небо небесе не довлеют ти, кольми паче храм сей, егоже создах имени твоему? ²⁸ и да призриши на молитву мою, Господи Боже израилев, послушати молитвы, еюже молится раб твой пред тобою к тебе днесь, ²⁹ да будут очи твои отверсты на храм сей день и нощь, на место о немже рекл еси: будет имя мое тамо на услышание молитвы, еюже молится раб твой на месте сем день и нощь: ³⁰ и услышиши молитву раба твоего и людий твоих израиля, о нихже помолятся на месте сем: и ты услышиши на месте обиталища твоего на небеси, и сотвориши и помилуеши: ³¹ елика аще согрешит кийждо ко искреннему своему, и аще приимет на него клятву еже кляти его, и приидет, и исповесть пред лицем олтаря твоего в храме сем: ³² и ты услышиши от небесе, и сотвориши суд людем твоим израилю: осудити беззаконнаго, дати путь его на главу его, и оправдити праведнаго, дати ему по правде его: ³³ егда падут людие твои израиль пред враги, яко согрешат ти, и обратятся к тебе, и исповедятся имени твоему, и помолятся и возглаголют молитву к тебе в храме сем: ³⁴ и ты услышиши с небесе, и милостив будеши о согрешениих людий своих израиля, и возвратиши я в землю, юже дал еси отцем их: ³⁵ внегда заключитися небеси и не быти дождю, яко согрешат ти, и помолятся на месте сем, и исповедятся имени твоему, и от грех своих обратятся, егда смириши их: ³⁶ и услышиши с небесе, и милостив будеши о гресех раба твоего и людий твоих израиля: яко явиши им путь благий ходити по нему, и даси дождь на землю, юже дал еси людем твоим в достояние: ³⁷ глад аще будет, смерть аще будет, егда будет возжжение, гусеницы, ржа аще будет, и аще оскорбят я врази их в единем от градов их: все противное, всяка болезнь, ³⁸ всяка молитва, всяко моление аще будет всякому человеку от людий израилевых, егда познает кийждо болезнь сердца своего, и воздвигнет руце свои в храме сем: ³⁹ и ты услышиши от небесе, от готоваго жилища твоего, и милостив будеши, и сотвориши, и даси коемуждо по путем его, якоже увеси сердце его, яко ты един токмо веси всех сердца сынов человеческих: ⁴⁰ да боятся тебе вся дни, в няже поживут на земли, юже дал еси отцем нашым: ⁴¹ и чуждему, иже несть от людий твоих израиля, той аще приидет от земли издалеча ради имене твоего, зане услышат имя твое велико, и руку твою крепкую, и мышцу твою высокую, ⁴² и приидет, и помолится на месте сем: ⁴³ и ты услышиши с небесе от готоваго жилища твоего, и сотвориши по всем, в еликих аще призовет тя чуждий, яко да уразумеют вси людие земнии имя твое и убоятся тебе, якоже людие твои израиль, и разумеют, яко имя твое наречеся на храме сем, егоже создах: ⁴⁴ егда изыдут людие твои на брань на враги своя, путем имже возвратиши я, и помолятся именем Господним путем града, егоже избрал еси себе, и ко храму, егоже аз создах имени твоему: ⁴⁵ и ты услышиши с небесе молитву их и моления их, и сотвориши оправдание им: ⁴⁶ яко согрешат ти, яко несть человек, иже не согрешит, и разгневаешися на ня, и предаси я пред враги, и попленят их пленящии в землю далече, или близ, ⁴⁷ и обратят сердца своя в земли, аможе преселишася, и обратятся, и помолятся тебе в земли преселения своего, глаголюще: согрешихом, беззаконновахом, неправдовахом: ⁴⁸ и обратятся ко тебе всем сердцем своим и всею душею своею в земли враг своих, аможе превел еси их, и помолятся к тебе по пути земли своея, юже дал еси отцем их, и ко граду, егоже избрал еси, и ко храму, егоже создах имени твоему: ⁴⁹ и услышиши от небесе, от готоваго жилища твоего молитву их и моление их, и сотвориши оправдание им, ⁵⁰ и милостив будеши неправдам их, имиже согрешиша ти, и по всем отметанием их, имиже отвергошася тебе, да даси их в щедроты пред пленившими их, и ущедрят я: ⁵¹ яко людие твои и наследие твое суть, ихже извел еси из земли египетския от среды пещи железныя: ⁵² и да будут уши твои и очи твои отверсты на молитву раба твоего и к молению людий твоих израиля, послушати их о всех, о нихже призовут тя, ⁵³ яко ты избрал еси я себе в наследие от всех людий земли, якоже глаголал еси рукою раба твоего моисеа, внегда извести тебе отцы нашя из земли египетския, Господи Господи. Тогда глагола соломон о храме, егда соверши созидати его: солнце познано сотвори на небеси: Господь рече пребывати во мгле: созижди храм мой, храм благолепный себе, еже пребывати в новости: не сие ли писано в книгах песни? ⁵⁴ И бысть егда сконча соломон моляся ко Господу всею молитвою и молением сим, и воста от лица олтаря Господня припад на колена своя, и руце свои возде на небо, ⁵⁵ и ста, и благослови весь собор израилев, гласом велиим глаголя: ⁵⁶ благословен Господь (Бог) днесь, иже даде покой людем своим израилю, по всем елика глагола: не пременися слово ни едино во всех словесех его благих, имиже глагола рукою моисеа раба своего: ⁵⁷ да будет Господь Бог наш с нами, якоже бе со отцы нашими: да не оставит нас, ниже да отвратит нас, ⁵⁸ преклонити сердца наша к нему, еже ходити во всех путех его и хранити вся заповеди его и повеления его и оправдания его, яже заповеда отцем нашым: ⁵⁹ и да будут словеса сия, имиже молихся пред Господем Богом нашим днесь, приближающеся Господу Богу нашему день и нощь, еже творити оправдания рабу твоему и оправдания людем твоим израилю во вся дни: ⁶⁰ яко да разумеют вси людие земли, яко Господь Бог той сам Бог, и несть инаго, ⁶¹ и да будут сердца наша совершенна ко Господу Богу нашему преподобно ходити в повелениих его и хранити заповеди его, якоже день сей. ⁶² И царь и вси сынове израилевы пожроша жертву пред Господем. ⁶³ И пожре царь соломон жертвы мирныя, яже пожре Господу, волов двадесять две тысящы и овец сто и двадесять тысящ. И обнови царь храм Господень и вси сынове израилевы. ⁶⁴ В той день освяти царь (соломон) средину двора, яже пред лицем храма Господня: яко сотвори тамо всесожжение и дары, и жертвы и тучная мирных, яко олтарь медяный, иже пред Господем, мал бе, еже не возмощи вместити всесожжения даров и жертвы мирных. ⁶⁵ И сотвори соломон праздник в той день, и весь израиль с ним, собор велий, от входа емафа даже до реки египта, пред Господем Богом нашим, у храма, егоже созда, ядый и пия и веселяся пред Господем Богом нашим седмь дний, ⁶⁶ и во осмый день распусти люди. И благословиша царя, и идоша кийждо в домы своя, радующеся веселым сердцем о благих, яже сотвори Господь давиду рабу своему и израилю людем своим.