¹ И дом свой созда соломон треминадесять леты, и соверши соломон весь дом свой. ² И созда дом древом ливанским, сто лакот долгота его, и тридесять лакот высота его, и пятьдесят лакот широта его, и три ряды столпов кедровых, и рамена кедрова столпом. ³ И покры дсками кедровыми дом свыше над странами столпов: и число столпов четыредесять и пять, ⁴ по пятинадесяти ряд: и окон три ряда, и камара над камарою трегубо. ⁵ И вся двери и камары четвероуголны притворени: от дверий над дверми трегубо. ⁶ И елам столпов, пятьдесят лакот в долготу, и тридесять лакот в широту привязани ко еламу пред лицем их: и столпи и толстота пред лицем того елама. ⁷ И елам престолов идеже судити, елам судилища, и покры и от земли даже до верха дщицами кедровыми. ⁸ И дом в немже живяше, двор един распростерт сим по делу сему: и дом созда дщери фараони, юже взя соломон, по еламу сему. ⁹ Вся сия бяху от каменей драгоценных изваяна от разстояния внутрьуду, и от основания до крова. ¹⁰ И внеуду ко двору великому основаному камением драгим великим, камением десяти лакот и осми лакот, ¹¹ и с верху честным камением, по тойже мере несеченых, и кедрами. ¹² Окрест двора великаго три ряда нетесаных, и ряд тесанаго кедра: и созда двор храма внутреннейший притвора дому сущаго пред лицем храма. ¹³ И посла царь соломон в тир, и взя хирама от тира, ¹⁴ сына жены вдовицы, и той бе от колена неффалимля: и отец его бе муж тирин, делатель меди, и исполнен художества и разума и ведения, еже делати всяко дело медяное. И приведоша его ко царю соломону: и сотвори вся дела: ¹⁵ и слия два столпа еламу храма, осминадесяти лакот высота столпа, и окрест мера его четыренадесятих лакот окружаше его толстота столпа: четырех перстов вглубления: такожде бе и вторый столп: ¹⁶ и два возложения сотвори, лежати на главах столпов излиянная от меди: пяти лакот высота возложения единаго, и пяти лакот высота возложения втораго: ¹⁷ и сотвори две мрежи еже покрыти возложения столпов: и мрежу возложению единому, и мрежу возложению второму: ¹⁸ и дело висимо, два ряда яблок медяных сомрежены, дело висимо, ряд над рядом: такожде сотвори возложению второму: ¹⁹ и возложения на главах столпов, подобна крину, якоже во еламе, четырех лакот: ²⁰ и строение над обоими столпами, и свыше стран возложение строения, и яблоков двести рядов около на вторей главе. ²¹ И постави столпы во еламе храма: и постави столп един и нарече имя ему иахун, и постави столп вторый и нарече имя ему воос. ²² И на главах столпов дело криново, и сконча дело столпов. ²³ И сотвори море лияно десять лакот от края до края его, кругло окрест его: пять лакот высота его, и объятие его тридесять лактей окружаше е окрест: ²⁴ и подкрепления под краем его окрест, окружаху е десять лакот около: два ряда подкреплений слиты во слиянии его стояща. ²⁵ И дванадесять волов под морем, три зрящии на север, и три зрящии на юг, и три на запад, и три на восток, и вся задняя их внутрьуду, и море верху их. ²⁶ И устие его бяше яко устие потиря прозябающаго крина, и толстота его на длань. ²⁷ И сотвори десять мехонофов медяных, пять лакот долгота мехонофа единаго, и четыри лакти широта его, и шесть лакот высота его: ²⁸ и сие дело мехонофов, споеное о себе и споеное посреде произницающих: ²⁹ и на споениих их посреде произницающих львы и волы и херувимы, и над произницающими, такожде и свыше и снизу львов и волов места, дело низхождения: ³⁰ и четыри колеса медна и мехонофу коемуждо, и придержания медяна, и четыри части их, и рамена их под умывалницами, и рамена слияная об ону страну коегождо прилежаще. ³¹ И уста его внутрь главы, и выше единаго лактя, и уста его кругла: дело такожде лактя единаго и пол лактя: и на устах его изваяния, и междустолпия их четвероуголна, а не кругла. ³² И четыри колеса под междустолпиями, и руце в колесех в мехонофе: и высота единаго колеса лакоть и пол. ³³ И дело колес, яко дело колес колесницы: руце их и выи их, и хребты их и делания их вся лияна. ³⁴ Четыри рамена на четырех углех мехонофа единаго, и от мехонофа рамена его. ³⁵ И на главе мехонофа пол лактя величество его, кругло окрест над главою мехонофовою: и начало рук его и спаяния его от него: и отверзашеся в началех рук своих. ³⁶ И спаяния его подобия херувимов и львов и фиников стоящая, держащееся коеждо противу лица его внутрь и окрест. ³⁷ По томужде сотвори вся десять мехонофы, по чину единому и по мере единей, мера едина всем. ³⁸ И сотвори десять конобов медяных вмещающих по четыредесяти мер во един коноб, мерою четырех лактей: коноб един на коемждо мехонофе, от десяти мехонофов. ³⁹ И постави пять мехонофов по десней стране храма на восток, и пять по левей стране храма: и море от страны храма одесную на востоки в угле полуденнем. ⁴⁰ И сотвори хирам конобы и теплицы и фиалы: и сконча хирам вся дела творя, яже творяше цареви соломону во храме Господни: ⁴¹ столпа два, и обвития столпов над главами столпов два: и мрежи две, еже покрывати оба обвития изваяных, яже на столпех суть: ⁴² яблоков медяных четыреста обема мрежема, два ряда яблоков мрежи единей, покрывати оба обвития мехонофа, яже на обоих столпех: ⁴³ и мехонофов десять и конобов десять на мехонофе: ⁴⁴ и море едино, и волов дванадесять под морем: ⁴⁵ и конобы и теплицы и фиалы, и вся сосуды, яже сотвори хирам царю соломону во храме Господни: и столпов четыредесять и осмь дому царева и дому Господня: вся дела царева, яже сотвори хирам, быша медяна вся. ⁴⁶ Близ иордана слия их царь в толстоте земли, между сокхофом и между сирамом. ⁴⁷ Не бе веса меди, от неяже творяше вся дела сия, от множества зело, не бе предела весу меди. ⁴⁸ И даде царь соломон вся сосуды, яже сотвори во храм Господень: олтарь златый и трапезу, на нейже хлебы приношения, златую, ⁴⁹ и свещники пять одесную и пять ошуюю пред лицем давира (святая святых) златыя спаяны, и лампады, и светилники, и щипцы златыя, ⁵⁰ и преддверие, и гвоздие, и фиалы и блюда и кадилницы златы спаяны: и вереи врат дому внутренняго святаго святых, и двери храма златыя. ⁵¹ И совершися дело, еже сотвори соломон во храме Господни: и внесе соломон святая давида отца своего и вся святая соломонова, сребро и злато, и сосуды даде в сокровище храма Господня.