¹ Егда же царство утвердися в руце соломона, сватовство сотвори соломон с фараоном царем египетским: и поят дщерь фараоню и введе ю во град давидов, дондеже сконча здати дом свой и дом Господень и стену Иерусалима окрест. ² Обаче людие тогда бяху жруще на высоких, яко не бе создан дом Господеви даже до дне онаго. ³ И возлюби соломон Господа, ходити в заповеданиих давида отца своего, токмо на холмех жряше и кадяше. ⁴ И воста соломон, и иде в гаваон пожрети тамо, яко тамо бе высота велия: тысящу всесожжения вознесе на жертвеннице в гаваоне. ⁵ И явися Господь соломону во сне нощию и рече ему: проси что хощеши себе. ⁶ И рече соломон: ты сотворил еси с рабом твоим давидом отцем моим милость велию, якоже ходи пред тобою истиною и правдою и правым сердцем с тобою, и сохранил еси ему милость великую сию, еже дати сыну его седети на престоле его, якоже днесь: ⁷ и ныне, Господи Боже мой, ты дал еси раба твоего вместо давида отца моего: и аз есмь отрочищь мал, и не вем исхода моего и входа моего: ⁸ раб же твой посреде людий твоих, ихже избрал еси людий многих, иже не изочтутся от множества: ⁹ и даси рабу твоему сердце смыслено слышати и судити люди твоя в правде, еже разумевати посреде добра и зла: яко кто может судити людем твоим тяжким сим? ¹⁰ И угодно бысть слово сие пред Господем, яко испроси соломон глагол сей. ¹¹ И рече Господь к нему: занеже просил еси от мене глагола сего, и не просил еси от мене дний многих, и не просил еси богатства, ниже просил еси душ враг твоих, но испросил еси себе разума, еже слышати суд: ¹² се, сотворих по глаголу твоему, се, дах ти сердце смыслено и мудро: якоже ты, не бысть муж прежде тебе и по тебе не востанет подобен тебе: ¹³ и яже не просил еси, дах тебе, и богатство и славу, якоже ты, не бысть муж подобен тебе в царех во вся дни твоя: ¹⁴ и аще пойдеши путем моим сохранити заповеди моя и повеления моя, якоже хождаше давид отец твой, и умножу дни твоя. ¹⁵ И возбудися соломон, и се, сновидение. И воста, и иде во Иерусалим, и ста пред лицем жертвенника, пред лицем кивота завета Господня в сионе, и вознесе всесожжения и сотвори мирная, и сотвори пир велий себе и всем отроком своим. ¹⁶ Тогда явистеся две жене блуднице пред царем и стасте пред ним. ¹⁷ И рече жена едина: во мне, господи мой: аз и жена сия жихоме в дому единем и родихоме в дому: ¹⁸ и бысть по третием дни рождения моего, и роди и жена сия: и бехом купно, и не бе никтоже с нами, кроме обоих нас в дому: ¹⁹ и умре сын жены сея в нощи, яко лежа на нем: ²⁰ и воста в полунощи, и взя отроча мое от объятий моих, и успи е на лоне своем, а отроча свое умершее положи на лоне моем: ²¹ и востах заутра накормити отроча мое, и обретох и мертво: и се, разсмотрих его рано, и се, не бе сын мой, егоже родих: ²² И рече другая жена: ни, но се есть сын мой живый, се же есть сын твой умерый. И прястеся пред царем. ²³ И рече има царь: ты глаголеши, яко сей сын мой живый, сын же сея мертвый: и ты глаголеши: ни, но живый есть сын мой, твой же сын умерший. ²⁴ И рече царь: принесите ми мечь. И принесоша мечь пред царя. ²⁵ И рече царь: разсецыте отроча ссущее живое на двое, и дадите половину его сей, и другую половину оней. ²⁶ И отвеща жена, еяже бе сын живый, и рече ко царю, понеже смятеся утроба ея о сыне ея, и рече: во мне, господи мой, дадите ей отроча живое, смертию же не умертвите его. И та рече: да не будет ни мне, ни тебе, но пресецыте е. ²⁷ И отвеща царь и рече: дадите детище живо жене рекшей: дадите сей е, смертию же не умертвите его: сия мати его. ²⁸ И слыша весь израиль суд сей, имже суди царь, и убояшася от лица царева, разумеша бо, яко разум Божий в нем еже творити оправдания.