¹ И приближишася давиду дние умрети ему, и заповеда соломону сыну своему, глаголя: ² аз отхожду в путь всея земли: ты же крепися, и буди муж совершен, ³ и сохрани завет Господа Бога твоего, еже ходити во всех путех его, хранити заповеди его и оправдания его, и судбы его и свидения его, писанная в законе моисеове: да разумееши яже сотвориши по всем, елика заповедах тебе: ⁴ да утвердит Господь слово свое, еже рече о мне, глаголя: аще сохранят сынове твои пути своя, еже ходити предо мною во истине всем сердцем своим и всею душею своею, глаголя: не искоренится тебе муж с престола израилева: ⁵ и ты веси, елика сотвори мне иоав сын саруин, елика сотвори двема воеводама сил израилевых, авениру сыну нирову и амессаю сыну иеферову, и уби их, и излия крови брани в мире, и даде кровь неповинных на поясе своем, иже на чреслех его, и на сапозе своем сущем на нозе его: ⁶ и сотвориши по мудрости твоей, и не сведеши старости его с миром во ад: ⁷ сыном же верзеллии галаадитина сотвориши милость, и да будут с ядущими трапезу твою: яко тако приближишася мне, внегда бежати мне от лица авессалома брата твоего: ⁸ и се, с тобою семей сын гирань сын иемениин от ваурима, и той прокля мя проклятием горьким, в день в оньже исхождах в полки: и той сниде на сретение ми на иордан, и кляхся ему о Господе, глаголя: не убию тя оружием: ⁹ и да не обезвиниши его, яко муж мудр еси ты, и увеси что сотвориши ему, и сведеши старость его с кровию во ад. ¹⁰ И успе давид со отцы своими, и погребен бысть во граде давидове. ¹¹ И бысть дний, в няже царствова давид во израили, четыредесять лет: в хевроне царствова седмь лет, во Иерусалиме же тридесять три лета. ¹² И соломон седе на престоле давида отца своего сын дванадесяти лет, и уготовася царствие его зело. ¹³ И вниде адониа сын аггифин к вирсавии матери соломони, и поклонися ей. Она же рече: мир ли вход твой? И рече: мир. ¹⁴ И рече: слово мне к тебе. И рече ему: глаголи. ¹⁵ И рече ей: ты веси, яко мне бе царство, и на мя весь израиль положи лице свое, еже царствовати, и обратися царство, и бысть брату моему, яко от Господа бысть ему: ¹⁶ и ныне прошения единаго аз прошу от тебе, не отврати лица своего. И рече ему вирсавиа: глаголи. ¹⁷ И рече к ней: рцы к соломону царю, яко не имать отвратити лица своего от тебе, и дабы ми дал ависагу сумантяныню в жену. ¹⁸ И рече вирсавиа: добре, аз имам глаголати о тебе к царю. ¹⁹ И вниде вирсавиа пред царя соломона глаголати ему о адонии. И воста царь на сретение ей, и поклонися ей, и седе на престоле своем: и поставиша престол другий матери цареве, и седе одесную его, ²⁰ и рече ему: прошения мала единаго аз прошу у тебе, не отврати лица моего. И рече к ней царь: проси, мати моя, яко не отвращуся от тебе. ²¹ И рече: даждь ависагу сумантяныню адонии брату твоему в жену. ²² И отвеща царь соломон и рече матери своей: вскую ты просиши ависаги сумантяныни адонии? еще проси ему и царства, яко той брат мой болший мене, и ему авиафар иерей, и ему иоав сын саруин воевода друг. ²³ И клятся царь соломон Господем, глаголя: сия да сотворит мне Бог и сия да приложит, яко на душу свою глагола адониа слово сие: ²⁴ и ныне жив Господь, иже уготова мя, и посади мя на престоле отца моего давида, и той сотвори ми дом, якоже глагола Господь, яко днесь умрет адониа. ²⁵ И посла царь соломон рукою ванеа сына иодаева, и уби его, и умре адониа в той день. ²⁶ И авиафару иерею рече царь: тецы ты во анафоф на село твое, яко муж смерти еси ты в днешний день, но не умерщвлю тебе, яко носил еси кивот завета Господня пред отцем моим (давидом), и яко озлоблен был еси во всех, имиже озлоблен бе отец мой. ²⁷ И изгна соломон авиафара, еже не быти ему иереем Господним, якоже сбытися словеси Господню, еже глагола на дом илиев в силоме. ²⁸ И слух дойде до иоава сына саруина, яко иоав последова адонии, и в след соломонь не уклонися. И бежа иоав в скинию Господню, и ятся рогов олтаревых. ²⁹ И возвестиша соломону, глаголюще: яко бежа иоав в скинию Господню, и се, держится рогов олтаревых. И посла царь соломон ко иоаву, глаголя: что ти бысть, яко убежал еси во олтарь? И рече иоав: яко убояхся от лица твоего, и бежах ко Господу. И посла соломон ванеа сына иодаева, глаголя: иди, и убий его, и погреби его. ³⁰ И прииде ванеа сын иодаев ко иоаву в скинию Господню, и рече ему: сия глаголет царь: изыди. И рече иоав: не изыду, но да зде умру. И возвратися ванеа сын иодаев и рече царю, глаголя: сия глагола иоав и сия отвеща мне. ³¹ И рече ему царь: иди и сотвори ему, якоже рече, и убий его, и погреби его, и отими днесь кровь, юже туне пролия иоав, от мене и от дому отца моего: ³² и возврати Господь кровь неправды его на главу его, якоже нападе на два мужа праведна и блага паче его, и уби их оружием: и отец мой давид не разуме крове их, авенира сына нирова, воеводу израилева, и амессая сына иеферова, воеводу иудина: ³³ и возвратися кровь их на главу его и на главу семене его во веки: давиду же и семени его, и дому его, и престолу его мир да будет до века от Господа. ³⁴ И взыде ванеа сын иодаев и нападе на него, и уби его, и погребе его в дому его в пустыни. ³⁵ И постави царь соломон ванеа сына иодаева вместо его над воинством: царство же управляшеся во Иерусалиме. И садока иереа даде соломон царь во иереа перваго вместо авиафара. (1) И даде Господь смысл соломону и премудрость многу зело, и широту сердца, якоже песок иже при мори: (2) и исполнися разума соломон паче разума всех древних сынов и паче всех мудрых египетских. И поят дщерь фараоню, и введе ю во град давидов, дондеже сконча себе здати дом свой, и дом Господень в первых, и стену Иерусалима окрест: (3) в седмь лет сотвори и сконча. (4) И бяше у соломона седмьдесят тысящ (мужей) носящих бремена, и осмьдесят тысящ каменосечцев в горе. И сотвори соломон море, и подкрепления, и бани великия, и столпы, и источник дворный, и море медяное: (5) и созда краеградие, и забрала над ним, и разсече град давидов. (6) Тако дщи фараоня прейде от града давидова в дом свой, егоже созда ей: (7) тогда созда краеградие. И соломон возношаше трижды в лето всесожжения и мирная на олтарь, егоже созда Господеви, и кадяше пред Господем, и соверши дом. И сии старейшины приставлени над делами соломоними, (8) три тысящы и шесть сот приставник за людьми делающими дело. И созда (9) ассур, и магдон и газер, и вефорон вышний и валалаф: обаче по создании дому Господня и стены Иерусалимския окрест, по сих созда грады сия. И еще жив сый давид, заповеда соломону глаголя: (10) се, с тобою семей сын гирань, сын семене иемениина, от хеврона: сей кляше мя клятвою укоризненною, в день в оньже идох в полки: и той сниде в сретение ми на иордан, и кляхся ему Господем, глаголя, яко не умерщвлю его оружием: и ныне да не обезвиниши его, яко муж смыслен еси ты, и разумееши яже сотвориши ему, и сведеши старость его с кровию во ад. ³⁶ И послав царь соломон, призва семеа и рече ему: созижди себе дом во Иерусалиме и седи тамо, и не исходи оттуду никаможе: ³⁷ и будет в день исхода твоего, и прейдеши поток кедрский, разумея разумей, яко смертию умреши: кровь твоя будет на главе твоей. И заклят его царь в день той. ³⁸ И рече семей к царю: благ глагол, егоже глаголал еси, господи мой царю: тако сотворит раб твой. И седе семей во Иерусалиме три лета. ³⁹ И бысть по триех летех, и бежаста два раба семеина ко агхусу сыну маахаину, царю гефску. И возвестиша семею, глаголюще: се, раби твои во гефе. ⁴⁰ И воста семей, и оседла осля свое, и иде во геф ко агхусу взыскати рабы своя: и пойде семей, и приведе рабы своя от гефа. ⁴¹ И возвестиша соломону, глаголюще: яко семей ходи из Иерусалима в геф и возврати рабы своя. ⁴² И посла царь и призва семеа и рече к нему: не заклях ли тя Господем, и засвидетелствовах тебе, глаголя: в оньже аще день изыдеши из Иерусалима и пойдеши на десно или на шуее, разумея разумей, яко смертию умреши? и рекл ми еси: благ глагол, егоже слышах: ⁴³ и что яко не сохранил еси клятвы Господни и заповеди, юже заповедах на тя? ⁴⁴ И рече царь к семею: ты веси всю злобу твою, юже весть сердце твое, яже сотворил еси давиду отцу моему: и возврати Господь злобу твою на главу твою: ⁴⁵ и царь соломон благословен, и престол давидов будет готов пред Господем во веки. ⁴⁶ И заповеда царь соломон ванею сыну иодаеву: и изыде, и уби его, и умре (семей).