¹ И бысть егда сяде царь в дому своем, и Господь унаследи его окрест от всех врагов его окрестных, ² и рече царь к нафану пророку: се, ныне аз живу в дому кедровем, кивот же Божий стоит посреде скинии. ³ И рече нафан к царю: вся елика суть в сердцы твоем, иди и твори, яко Господь с тобою. ⁴ И бысть в нощи той, и бысть слово Господне к нафану, глаголя: ⁵ иди и рцы рабу моему давиду: сия глаголет Господь: не ты созиждеши мне дом, еже обитати мне: ⁶ яко не обитах в дому, от негоже дне изведох сыны израилевы из земли египетския до дне сего, но бех ходя во обиталищи и в кущи, ⁷ во всех идеже хождах во всем израили: аще глаголя глаголах ко единому колену израилеву, емуже заповедах пасти люди моя израиля, глаголя: почто не создасте ми дому кедрова? ⁸ и ныне сия речеши рабу моему давиду: сице глаголет Господь вседержитель: поях тя от пажити овчия на властелинство людем моим израилю, ⁹ и бех с тобою во всех, аможе ходил еси, и искорених вся враги твоя от лица твоего, и сотворих тя именита по имени великих иже на земли, ¹⁰ и положу место людем моим израилю, и насажду их, и вселятся о себе сами, и не попекутся ктому: и не приложит сын неправды обидети их, якоже исперва, ¹¹ и от дний в няже поставих судии в людех моих во израили: и упокою тя от всех враг твоих: и возвестит ти Господь, яко созиждеши дом ему: ¹² и будет егда исполнятся дние твои, и уснеши со отцы твоими, и возставлю семя твое по тебе, иже будет от чрева твоего, и уготовлю царство его: ¹³ той созиждет дом имени моему, и управлю престол его до века: ¹⁴ аз буду ему во отца, и той будет ми в сына: и аще приидет неправда его, и обличу его жезлом мужей и язвами сынов человеческих: ¹⁵ милости же моея не отставлю от него, якоже отставих от тех, ихже отставих от лица моего: ¹⁶ и верен будет дом его и царство его до века предо мною: и престол его будет исправлен во век. ¹⁷ По всем словесем сим и по всему видению сему, тако глагола нафан ко давиду. ¹⁸ И вниде царь давид и седе пред Господем и рече: кто есмь аз, Господи мой, Господи? и что дом мой, яко возлюбил мя еси даже до сих? ¹⁹ и мала сия пред тобою суть, Господи мой, Господи, и глаголал еси о доме раба твоего вдалеко: сей же закон человека, Господи мой, Господи: ²⁰ и что приложит давид еще глаголати к тебе? и ныне ты веси раба твоего, Господи мой, Господи, ²¹ и раба твоего ради сотворил еси и по сердцу твоему сотворил еси все величество сие, сказати рабу твоему, ²² величия ради твоего, Господи мой, Господи: несть бо ин якоже ты, и несть Бога разве тебе во всех, яже слышахом ушима нашима: ²³ и кто якоже людие твои израиль язык ин на земли? яко настави их Бог, еже избавити себе людий, еже положити тебе имя, еже сотворити величие и просвещение, еже изринути тебе от лица людий твоих, ихже избавил еси себе от египта, языки и селения, ²⁴ и уготовал еси себе люди твоя израиля в люди до века, и ты, Господи, был еси им в Бога: ²⁵ и ныне, Господи мой, Господи, слово, еже глаголал еси о рабе твоем и о доме его, увери до века, якоже глаголал еси, сотвори: ²⁶ и ныне да возвеличится имя твое до века, глаголя: Господь вседержитель Бог над израилем, и дом раба твоего давида да будет исправлен пред тобою: ²⁷ яко ты Господь вседержитель Бог израилев, отверзл еси ухо рабу твоему, глаголя: дом созижду тебе: сего ради обрете раб твой сердце свое еже помолитися к тебе молитвою сею: ²⁸ и ныне, Господи мой, Господи, ты еси Бог, и словеса твоя будут истинна, и глаголал еси о рабе твоем благая сия, ²⁹ и ныне начни и благослови дом раба твоего, еже быти ему во век пред тобою, яко ты, Господи мой, Господи, глаголал еси, и от благословения твоего да благословится дом раба твоего, еже быти во век пред тобою.