¹ И бысть приходящу давиду и мужем его к секелагу в день третий, и амалик нападе на южную страну и на секелаг, и порази секелаг и сожже его огнем: ² жен же и всех сущих в нем от мала до велика не умертвиша мужа ни жены, но плениша, и отидоша в путь свой. ³ И прииде давид и мужие его во град, и се, сожжен бяше огнем, жены же их и сынове их и дщери их пленени быша. ⁴ И воздвиже давид и мужие его глас свой и плакашася дондеже не бе в них силы ктому плакатися. ⁵ И жены обе давидовы пленени быша, ахинаам иезраилитыня, и авигеа бывшая жена навала кармилскаго. ⁶ И оскорбе давид зело, яко совещашася людие камением побити его, яко скорбна бяше душа всех людий коегождо о сынех своих и о дщерех своих. И укрепися давид о Господе Бозе своем, ⁷ и рече давид ко авиафару иерею сыну авимелехову: принеси ефуд. И принесе авиафар ефуд к давиду. ⁸ И вопроси давид Господа, глаголя: пожену ли вслед полчища сего? и постигну ли их? И рече Господь: гони, яко постизая постигнеши их и избавляя избавиши. ⁹ И иде давид сам и шесть сот мужей с ним, и приидоша даже до потока восорска, прочии же осташася: ¹⁰ и гна с четырми сты мужей, двести же мужей осташася, иже седоша об он пол потока восорска. ¹¹ И обретоша мужа египтянина на селе, и яша его, и приведоша его к давиду, и даша ему хлеба, и яде, и напоиша его водою: ¹² и даша ему часть смоквей, и яде, и укрепися дух его в нем, яко не яде хлеба и не пи воды три дни и три нощы. ¹³ И рече ему давид: откуду еси, и чий еси ты? И рече отрок египтянин: аз есмь раб мужа амаликитянина, и остави мя господин мой, яко изнемогох днесь уже третий день: ¹⁴ и мы ходихом на юг до хелефи и на иудейския страны и на гелвуй, и секелагу пожгохом огнем. ¹⁵ И рече ему давид: доведеши ли мя до полчища сего? И рече: кленися ми Богом, яко не убиеши мя и не предаси мя в руце господину моему, и доведу тя до полчища сего. ¹⁶ (И клятся ему давид:) и приведе его онамо, и се, тии разсеяни быша по лицу всея земли, ядуще и пиюще и празднующе о всех корыстех великих, яже взяша от земли иноплеменничи и от земли иудины. ¹⁷ И прииде на них давид, и изби их от утра даже до вечера и наутрие: и не спасеся от них муж, разве четыреста отрок, иже вседоша на велблюды и убежаша. ¹⁸ И отя давид вся елика взяша амаликиты, и обе жены своя отя, ¹⁹ и не погибе им от мала даже до велика, и от корыстей, и даже до сынов и дщерей и даже до всех, яже взяша, и вся возврати давид: ²⁰ и взя давид вся стада и паствины, и погна пред пленом: и плен оный нарицашеся сей плен давидов. ²¹ И прииде давид к двема стом мужем оставшымся ити вслед давида, ихже посади на потоце восорсте, и изыдоша на сретение давиду и на сретение людем иже с ним: и прииде давид до людий, и вопросиша его о мирных. ²² И отвещаша вси мужие пагубнии и лукавнии от мужей ратных ходивших с давидом и реша: яко не гониша с нами, не дадим им от плена, егоже взяхом, но токмо кийждо жену свою и чада своя да возмут и возвратятся. ²³ И рече давид: не сотворите, братия моя, тако, повнегда предаде Господь нам и сохрани нас, и предаде Господь полчище сие нашедшее на ны в руки нашя: ²⁴ и кто послушает ваших словес сих? яко не менши нас суть: понеже по части исходящаго на брань, тако будет часть седящаго при сосудех, по томужде разделятся. ²⁵ И бысть от дне того и выше, и бысть в повеление и на оправдание израилю даже до дне сего. ²⁶ И прииде давид в секелаг, и посла старейшинам от корыстей иудиных и искренним своим, глаголя: се, вам благословение от корыстей врагов Господних, ²⁷ сущым в вефсуре и в раме южней и в гефоре, ²⁸ и во ароире и во аммаде, и во сафе и во есфифе и в гефе, ²⁹ и в кинане и в сафеце, и в фимафе и в кармиле, и сущым во градех иеремиила и во градех кенезия, ³⁰ и сущым во иеримуфе и во вирсавеи и в номве, ³¹ и сущым в хевроне, и во вся места, яже пройде давид тамо сам и мужие его.