¹ И воста давид оттуду и седе во узинах енгадди. ² И бысть егда возвратися саул вспять от иноплеменник, и возвестиша ему, глаголюще: се, давид в пустыни енгадстей. ³ И взя саул с собою три тысящы мужей избранных от всего израиля и иде искати давида и мужей его прямо лицу саддеем: ⁴ и прииде до стад пасомых на пути, и бе тамо вертеп: и саул вниде испразднитися, давид же и мужие его во внутренних вертепа седяху. ⁵ И реша мужие давидовы к нему: се, день сей, о немже рече Господь тебе предати врага твоего в руце твои, и сотвориши ему якоже угодно пред очима твоима. И воста давид, и отреза воскрилие одежды саули отай. ⁶ И бысть по сих, и вострепета давиду сердце его, яко отреза воскрилие одежды саули: ⁷ и рече давид к мужем своим: никакоже ми от Господа, аще сотворю глагол сей господину моему христу Господню, еже нанести руку мою нань, яко христос Господень есть сей. ⁸ И увеща давид мужы своя словесы и не даде им воставшым убити саула. И воста саул, и сниде на путь. ⁹ И изыде давид вслед его из вертепа: и возопи давид вслед саула, глаголя: господине царю. И озреся саул вслед себе, и преклонися давид лицем своим до земли, и поклонися ему. ¹⁰ И рече давид к саулу: почто слушаеши словес людий глаголющих: се, давид ищет души твоея? ¹¹ се, днесь видеста очи твои, яко предаде тя Господь днесь в руце мои в вертепе, и не восхотех убити тебе, и пощадех тя, и рех: не нанесу руки моея на господа моего, яко помазанник Господень сей есть: ¹² и се, воскрилие одежды твоея в руце моей, аз отях воскрилие одежды твоея, и не убих тебе: и уразумей, и виждь днесь, яко несть злобы в руце моей, ниже нечестия и презорства, ниже согреших к тебе, а ты ищеши души моея изяти ю: ¹³ да судит Господь между мною и тобою, и да защитит мя Господь от тебе: рука же моя не будет на тя, ¹⁴ якоже глаголется притча древняя: от беззаконник изыдет преступление: рука же моя не будет на тя: ¹⁵ и ныне ты, царю израилев, вслед кого исходиши? кого ты гониши? вслед ли пса умерша и вслед блохи единыя? ¹⁶ да будет Господь судия и отмститель между мною и тобою, да видит Господь и судит суд мой, и осудит мя от руки твоея. ¹⁷ И бысть, егда сконча давид глаголы сия, глаголя к саулу, и рече саул: твой ли глас сей, чадо давиде? И воздвиже саул глас свой и восплакася. ¹⁸ И рече саул к давиду: праведен еси ты паче мене, яко ты воздал ми еси благая, аз же тебе воздах злая: ¹⁹ и ты возвестил ми еси днесь, яже сотворил ми благая, яко заключи мя Господь в руки твоя днесь, и не убил мя еси: ²⁰ и якоже аще кто обрел бы врага своего в печали, и отпустил бы его в путь благ, и Господь воздаст ему благая, якоже ты сотворил еси днесь: ²¹ и ныне се, аз вем, яко царюя царствовати имаши, и стати имать в руце твоей царство израилево: ²² и ныне кленися ми Господем, яко не искорениши семене моего по мне и не погубиши имене моего от дому отца моего. ²³ И клятся давид саулу. И отиде саул на место свое, давид же и мужие его взыдоша в мессеру тесную.