¹ И прииде давид в номву ко авимелеху иерею: и ужасеся авимелех о пришествии его и рече ему: что яко ты един, и никтоже с тобою? ² И рече давид иерею: царь заповеда ми глагол днесь и рече ко мне: никтоже да уразумеет глагола, егоже ради аз посылаю тя и о немже аз заповедаю ти: и отроки оставих на месте глаголемем еммоним: ³ и ныне аще суть у тебе пять хлебы, даждь ми елико имаши. ⁴ И отвеща иерей давиду и рече: не суть хлебы прости у мене, но точию хлебы у мене священнии: аще сохранени отроцы суть токмо от жены, снедят. ⁵ И отвеща давид иерею и рече ему: и (мы) от жен воздержахомся вчера и третияго дне: отнележе изыдох аз на путь, быша вси отроцы очищени, и сей путь нечист, но освятится днесь сосуд ради моих. ⁶ И даде ему авимелех иерей хлебы предложения, яко тамо не бе хлеба, но токмо хлебы лица, иже взяты от лица Господня, еже предложитися хлебу теплому, в оньже день взя их. ⁷ И бе тамо един от отрок сауловых в день он удержан пред Господем, и имя ему доик сирин, (старейшина от пастырь сауловых,) пасый мски сауловы. ⁸ И рече давид ко авимелеху: виждь, аще есть зде у тебе копие или мечь, яко меча моего и оружия моего не взях с собою, яко царево повеление внезапу ми бысть. ⁹ И рече иерей: се, мечь голиафа иноплеменника, егоже ты убил еси во юдоли ила, и той обвит бяше в ризу за ефудом: аще той хощеши взяти, возми себе, несть бо инаго зде кроме сего. И рече давид: се, несть якоже той: даждь ми его. И даде его ему. ¹⁰ И воста давид, и убеже в той день от лица саулова, и прииде давид ко анхусу царю гефску. ¹¹ И реша отроцы анхусовы к нему: не сей ли давид царь земли? не сему ли изыдоша (жены) ликующыя, глаголющя: победи саул с тысящами своими, и давид со тмами своими? ¹² И положи давид глаголы сия в сердцы своем, и убояся зело от лица анхуса царя гефска. ¹³ И измени лице свое пред ним, и притворися в день той, и бияше во врата града, яко в тимпан, и падаше на руки своя, и паде у врат града, и слины своя точаше по браде своей. ¹⁴ И рече анхус ко отроком своим: се, видесте мужа неистова, почто его введосте ко мне? ¹⁵ еда не имею аз неистовых, яко введосте его, да беснуется предо мною? сей да не внидет в дом мой.