¹ И изыдоша вси сынове израилевы, и собрашася весь сонм яко един муж, от дана и до вирсавии, и земля галаадска к Господеви в массифу, ² и сташа пред лицем Господним вся племена израилева в сонме людий Божиих, четыреста тысящ мужей пеших воздвизающих оружия. ³ И услышаша сынове вениамини, яко взыдоша сынове израилевы в массифу, и рекоша сынове израилевы: глаголите, где бысть злоба сия? ⁴ И отвеща муж левитин, муж жены умореныя, глаголя: в гаваон вениаминь приидох аз и подложница моя витати: ⁵ и восташа на мя мужие гаваонстии и обыдоша мя во дворе нощию, и хотеша мя убити, и подложницу мою обидеша и обругаша, и умре: ⁶ и взях подложницу мою и раздробих ю, и послах ю во вся пределы наследия израилева, яко сотвориша безумие во израили: ⁷ се, вси вы сынове израилевы, дадите себе слово и совет зде. ⁸ и восташа вси людие яко един муж, глаголюще: не отидет муж в селение свое, и не возвратится муж в дом свой: ⁹ и ныне слово сие, еже сотворим гаваону: взыдем на него по жребию, ¹⁰ токмо возмем по десяти мужей от ста во всех племенех израилевых, и сто от тысящи, и тысяща от тмы, взяти брашно людем исходящым в гаваю вениаминю, сотворити ему по всему согрешению, еже сотвори во израили. ¹¹ И собрашася вси мужие израилевы ко граду, яко един муж из градов исходяще, ¹² и послаша племена израилева мужей во все племя вениамине, глаголюще: кая злоба сия бывшая в вас? ¹³ и ныне дадите мужей беззаконных, иже в гаваи, сынов велиаловых, и умертвим их, и очистим зло от израиля. И не изволиша сынове вениамини послушати гласа братии своея сынов израилевых. ¹⁴ И собрашася сынове вениамини от градов своих в гаваю, изыти на брань к сыном израилевым. ¹⁵ И сочтошася сынове вениамини от градов в той день двадесять и пять тысящ мужей воздвизающих оружия, кроме живущих в гаваи: ¹⁶ ихже сочтеся седмь сот мужей избранных от всех людий ободесноручных: сии вси пращницы мещуще камение ко власу и не погрешающе. ¹⁷ И всех мужей израилевых сочтеся, кроме сынов вениаминовых, четыреста тысящ мужей воздвизающих оружие: вси сии мужие воини. ¹⁸ И восташа, и взыдоша в вефиль, и вопросиша Бога, и рекоша сынове израилевы: кто от нас взыдет в начале воевати на сыны вениамини? И рече Господь: иуда в начале да взыдет вождь. ¹⁹ И восташа сынове израилевы заутра и ополчишася на гаваю. ²⁰ И изыде всяк муж израилев на брань с вениамином, и сразишася с ними мужие израилевы на брани у гаваи. ²¹ И изыдоша сынове вениаминовы из гаваи, и избиша во израили в той день двадесять две тысящы мужей на земли. ²² И укрепися всяк муж израилев, и приложиша снитися на брань на место, идеже снидошася в день первый. ²³ И взыдоша сынове израилевы и плакашася пред Господем до вечера, и вопросиша Господа, глаголюще: аще приложим еще приступити на брань к сыном вениаминим братиям нашым? И рече Господь: взыдите к ним. ²⁴ И приидоша сынове израилевы к сыном вениаминим в день вторый. ²⁵ И изыдоша сынове вениамини противу им от гаваи в день вторый, и избиша еще от сынов израилевых осмьнадесять тысящ мужей на земли: сии вси воздвизающии оружие. ²⁶ И взыдоша вси сынове израилевы и вси людие, и приидоша в вефиль, и плакашася, и седоша тамо пред Господем, и постишася в той день даже до вечера: ²⁷ и вознесоша всесожжение спасения пред Господем, яко тамо кивот завета Господа Бога во дни оны, ²⁸ и финеес сын елеазара сына аароня предстоя пред ним в тыя дни. И вопросиша сынове израилевы Господа, глаголюще: аще приложим взыти еще на брань к сыном вениаминим братиям нашым, или оставим? И рече Господь: взыдите, заутра предам их в руки вашя. ²⁹ И поставиша сынове израилевы подсаду окрест гаваи. ³⁰ И взыдоша сынове израилевы к сыном вениаминим в день третий: и ополчишася на гаваю яко единою и единою. ³¹ И изыдоша сынове вениамини противу людем и протягошася из града, и начаша убивати людий уязвленых, якоже первое и второе на путех, от нихже есть един сходяй в вефиль, а другий в гаваю на селе, яко тридесять мужей во израили. ³² И рекоша сынове вениамини: падают пред нами якоже и прежде. И сынове израилевы рекоша: побежим и отторгнем их от града на пути. И сотвориша тако. ³³ И вси мужие израилевы восташа от места своего и снидошася в ваал-фамаре: подсада же израилева нахождаше от места своего от запада гаваи. ³⁴ И приидоша противу гаваи десять тысящ мужей избранных от всего израиля, и брань бяше тяжка: и тии не разумеша, яко постизает их зло. ³⁵ И порази Господь вениамина пред сыны израилевыми: и избиша сынове израилевы от вениамина в той день двадесять пять тысящ и сто мужей: сии вси воздвизаху оружие. ³⁶ И видеша сынове вениамини, яко поражени суть. И даша место сынове израилевы вениамину, понеже уповаша на подсаду, юже подсадиша у гаваи: ³⁷ и подвижеся подсада, и устремися на гаваю, и избиша весь град острием меча. ³⁸ И израилтяне имяху знамение с подсадою брани, явити знамение дыма из града. ³⁹ И возвратися израиль на брань, и вениамин нача убивати язвеных во израили до тридесяти мужей, яко рекоша: паки падением падают пред нами, якоже и первая брань. ⁴⁰ И знамение взыде наипаче над градом, аки столп дыма: и озреся вениамин вспять, и се, взыде скончание града до небеси. ⁴¹ И муж израилев возвратися: и потщашася мужие вениамини, видеша бо, яко постиже их зло, ⁴² и побегоша пред сыны израилевыми на путь пустыни, брань же постиже их, и иже из градов избиваша их среде себе: ⁴³ и побиваху вениамина, и гнаша его от нуа вслед его до гаваи без опочивания, и поразиша его даже противу гаваи на восток солнца. ⁴⁴ И падоша от вениамина осмьнадесять тысящ мужей, сии вси мужие сильнии. ⁴⁵ И озрешася оставшии, и побегоша в пустыню к каменю реммоню: и пожаша от них сынове израилевы по стезям яко стеблие пять тысящ мужей, и гнаша вслед их до гадаама и избиша от них две тысящы мужей. ⁴⁶ И быти всех падших от вениамина в той день двадесять пять тысящ мужей воздвизающих оружие, вси сии мужие сильнии. ⁴⁷ И озрешася оставшии, и вбегоша в пустыню к каменю реммоню шесть сот мужей, и седеша в камени реммони четыри месяцы. ⁴⁸ Сынове же израилевы возвратишася к сыном вениаминим, и избиша я оружием от града вне, даже и до скота, и все еже обретеся во всех градех, и грады вся обретшыяся пожгоша огнем.