¹ И бысть муж от горы ефремли, и имя ему миха: ² и рече матери своей: тысяща и сто сребреников иже украдены у тебе, и заклинала мя еси и глаголала еси во ушы мои: се, сребро у мене, аз взях е. И рече мати его: благословен сын мой Господеви. ³ И отдаде тысящу и сто сребреников матери своей. И рече мати его: освящающи освятих сребро Господеви от руки моея, тебе сынови моему сотворити (кумир) изваян и слиян, и ныне отдам е тебе. ⁴ И отдаде сребро матери своей. И взя мати его двести сребреников и даде их среброделю, и сотвори тое (кумир) изваян и слиян: и бысть в дому михи. ⁵ И дом михин ему дом Божий. И сотвори ефуд и ферафин: и наполни руку единому от сынов своих, и бысть ему жрец. ⁶ В тыя же дни не бяше царя во израили: кийждо муж, еже право видяшеся пред очима его, творяше. ⁷ И бысть юноша от вифлеема иудина и от рода племене иудина, и сей левитин, и обиташе тамо: ⁸ и пойде сей муж от града вифлеема иудина обитати, идеже обрящет место: и прииде до горы ефремли и даже до дому михина, еже сотворити путь свой. ⁹ И рече ему миха: откуду идеши? И рече ему левитин: аз есмь от вифлеема иудина, и иду обитати, идеже обрящу место. ¹⁰ И рече ему миха: седи со мною и буди ми отец и жрец, и аз дам тебе сребреников десять в год и двои ризы, и яже на житие тебе. ¹¹ И пойде левит, и нача обитати у мужа. И бысть юноша ему яко един от сынов его. ¹² И наполни миха руку левитину, и бысть ему юноша жрец, и бяше в дому михи. ¹³ И рече миха: ныне уведех, яко благосотворит мне Господь, яко бысть мне левитин жрец.