¹ И рекоша к гедеону мужие ефремли: что сие сотворил еси нам, яко не позвал еси нас, егда ходил воевати на мадиама? И пряхуся с ним сильно. ² И рече к ним (гедеон): что сотворих ныне якоже вы? не лучше ли гроздец ефремль, нежели обрание винограда авиезерова? ³ в руку вашу предаде Господь князи мадиамли, орива и зива: и что возмогох сотворити якоже вы? Тогда утолися дух их от него, егда глагола им слово сие. ⁴ И прииде гедеон ко иордану, и прейде сам и иже с ним триста мужей, алчни и утруждени гоняще. ⁵ И рече мужем сокхофским: дадите хлебы на пищу мужем сим иже со мною, яко алчни суть: аз же гоню вслед зевеа и салмана, царей мадиамских. ⁶ И рекоша князи сокхофстии: еда рука зевеа и салмана ныне в руце твоей, яко дадим воем твоим хлебы? ⁷ И рече гедеон: не тако: но егда предаст Господь зевеа и салмана в руку мою, аз сотру плоти вашя тернием пустынным и волчцами. ⁸ И взыде оттуду во фануил и глагола к ним такожде. И отвещаша ему мужие фануили, якоже отвещаша ему мужие сокхофстии. ⁹ И рече гедеон мужем фануилским, глаголя: егда возвращуся с миром, раскопаю столп сей. ¹⁰ И зевей и салман быша в каркаре, и полк их с ними до пятьнадесяти тысящ (мужей) оставшихся от всего полка сынов восточных: и умерших бяше сто и двадесять тысящ мужей держащих оружие. ¹¹ И взыде гедеон путем живущих в кущах от востоков прямо навы и иегевала: и изби полк, полк же бяше надежен. ¹² И побегоста зевей и салман: и гна вслед их, и поима оба царя мадиамля, зевеа и салмана, и весь полк их смяте. ¹³ И возвратися гедеон сын иоасов от рати прежде восхода солнца, ¹⁴ и ят отрочища от мужей сокхофских и вопроси его: и вписа от него имена князей сокхофских и старейшин их, седмидесяти и седми мужей. ¹⁵ И прииде гедеон ко князем сокхофским и рече им: се, зевей и салман, ихже ради укористе мя, глаголюще: еда рука зевеа и салмана ныне в руце твоей, яко дадим мужем твоим утруждшымся хлебы? ¹⁶ И поя князи и старейшины града, и терние от пустыни и волчцы, и сотре ими мужы сокхофски: ¹⁷ и столп фануилев раскопа, и изби мужы градския. ¹⁸ И рече к зевею и салману: какови мужие, ихже избисте в фаворе? и реша: якоже ты, тако они, подобен ты еси им, яко подобие сынов царевых. ¹⁹ И рече гедеон: братия моя и сынове матере моея суть: жив Господь, аще бысте живили их, не убил бых вас. ²⁰ И рече иеферу первенцу своему: востав убий их. И не извлече отрочищь меча своего: зане убояся, яко млад бяше. ²¹ И рече зевей и салман: востани убо ты, и сопротивися нам: зане яко муж сила его. И воста гедеон, и уби зевеа и салмана: и взя украшения, яже на выях велблюдов их. ²² И рекоша мужие израилстии ко гедеону: владей нами и ты, и сынове твои, и сынове сынов твоих, яко ты спасл еси нас от руки мадиамли. ²³ И рече к ним гедеон: не возобладаю аз вами, и не возобладает сын мой вами: Господь да владеет вами. ²⁴ И рече к ним гедеон: попрошу у вас прошения, и да даст мне всяк муж усерязь от плена своего: яко усерязи златы (мнози) и бяху им, зане исмаилтяне бяху. ²⁵ И рекоша: дающе дадим. И простре ризу, и ввергоша ту мужие по и усерязю от плена своего. ²⁶ И бысть вес усерязь златых, ихже испроси, тысяща и седмь сот сикль злата, кроме плениц и монист (енфофовых), и риз багряных, яже на царех мадиамлих, и кроме чепей златых, яже на выях велблюдов их. ²⁷ И сотвори от них гедеон ефуд, и постави его во граде своем во ефрафе. И соблуди весь израиль по нем тамо: и бысть гедеону и всему его дому в соблазн. ²⁸ И смирися мадиам пред сыны израилевыми, и не приложиша воздвигнути главы своея. И бысть в покои земля четыредесять лет, во дни гедеоновы. ²⁹ И иде иероваал сын иоасов, и седе в дому своем. ³⁰ И гедеону быша седмьдесят сынов, изшедшии от чресл его, яко жены бяху многи ему. ³¹ И подложница его яже в сикиме и сия роди ему сына, и нарече имя ему авимелех. ³² И умре гедеон сын иоасов в старости блазе, и погребеся во гробе иоаса отца своего, во ефрафе, отца езриева. ³³ И бысть егда умре гедеон, и совратишася сынове израилевы и соблудиша вслед ваалима, и сотвориша себе со ваалверифом завет, да им будет бог: ³⁴ и не воспомянуша сынове израилевы Господа Бога своего, избавльшаго их из руки всех враг их окрестных: ³⁵ и не сотвориша милости с домом иеровааловым, сей есть гедеон, по всей благостыни его, юже сотвори со израилем.