¹ И в месяц седмый, первый (день) месяца нарочит свят да будет вам: всякаго дела служебна да не сотворите: день знамения будет вам. ² И сотворите всесожжения в воню благовония Господу, телца от волов единаго, овна единаго, агнцев единолетных седмь непорочных: ³ жертва их мука пшенична вмешана в елеи: три десятины телцу единому и две десятины овну единому: ⁴ по десятине агнцу единому, седми агнцем: ⁵ и козла от коз единаго греха ради, во еже умолити о вас: ⁶ кроме всесожжений новомесячия и жертвы их, и возлияния их, и всесожжение всегдашнее: и жертвы их и возлияния их, по уставу их, в воню благовония Господу. ⁷ И десятый день месяца сего нарочит свят да будет вам: и озлобите душы вашя, и всякаго дела служебна да не сотворите, ⁸ и принесете всесожжение в воню благовония Господу, приносы Господу: телца единаго от говяд, овна единаго, агнцев единолетных седмь: непорочны да будут вам: ⁹ жертва их мука пшенична вмешана в елеи: три десятины телцу единому и две десятины овну единому: ¹⁰ по десятине агнцу единому, на седмь агнцев: ¹¹ и козла единаго от коз греха ради, во еже умолити о вас: кроме еже греха ради очищения, и всесожжение всегдашнее: жертва его и возлияние его, по уставу его в воню благовония принос Господу. ¹² И пятыйнадесять день седмаго месяца сего нарочит свят да будет вам: всякаго дела служебна да не сотворите, и празднуйте той праздник Господеви седмь дний, ¹³ и принесите всесожжения принос в воню благовония Господу: в первый день телцев от говяд тринадесять, овна два, агнцев единолетных четыренадесять: непорочны да будут вам: ¹⁴ жертвы их мука пшенична вмешана в елеи: три десятины телцу единому, тремнадесяти телцем, и две десятины овну единому, на два овна: ¹⁵ по десятине агнцу единому, на четыренадесять агнцев: ¹⁶ и козла единаго от коз греха ради: кроме всесожжения всегдашняго, жертвы их и возлияния их. ¹⁷ И в день вторый телцев дванадесять, овна два, агнцев единолетных четыренадесять непорочных: ¹⁸ жертва их и возлияния их телцем и овном и агнцем по числу их, по уставу их: ¹⁹ и козла единаго от коз греха ради: кроме всесожжения всегдашняго, жертвы их и возлияния их. ²⁰ В день третий телцев единнадесять, овна два, агнцев единолетных четыренадесять непорочных: ²¹ жертва их и возлияния их телцем и овном и агнцем по числу их, по уставу их: ²² и козла от коз единаго греха ради: кроме всесожжения всегдашняго, жертвы их и возлияния их. ²³ В день четвертый телцев десять, овна два, агнцев единолетных четыренадесять непорочных: ²⁴ жертвы их и возлияния их телцем и овном и агнцем по числу их, по уставу их: ²⁵ и козла от коз единаго греха ради: кроме всесожжения всегдашняго, жертвы их и возлияния их. ²⁶ В день пятый телцев девять, овна два, агнцев единолетных четыренадесять непорочных: ²⁷ жертвы их и возлияния их телцем и овном и агнцем но числу их, по уставу их: ²⁸ и козла от коз единаго греха ради: кроме всесожжения всегдашняго, жертвы их и возлияния их. ²⁹ В день шестый телцев осмь, овна два, агнцев единолетных четыренадесять непорочных: ³⁰ жертвы их и возлияния их телцем и овном и агнцем по числу их, по уставу их: ³¹ и козла от коз единаго греха ради: кроме всесожжения всегдашняго, жертвы их и возлияния их. ³² В день седмый телцев седмь, овна два, агнцев единолетных четыренадесять непорочных: ³³ жертвы их и возлияния их телцем и овном и агнцем по числу их, по уставу их: ³⁴ и козла от коз единаго греха ради: кроме всесожжения всегдашняго, жертвы их и возлияния их. ³⁵ И в день осмый исход будет вам: всякаго дела служебна да не сотворите в онь, ³⁶ и да принесете всесожжения в воню благовония Господу, телца единаго, овна единаго, агнцев единолетных седмь непорочных: ³⁷ жертвы их и возлияния их телцу и овну и агнцем по числу их, по уставу их: ³⁸ и козла от коз единаго греха ради: кроме всесожжения всегдашняго, жертвы их и возлияния их. ³⁹ Сия сотворите Господу в праздники вашя, кроме обетов ваших, и вольная ваша, и всесожжения ваша, и жертвы вашя, и возлияния ваша, и спасителная ваша.