¹ И пришедшя дщери салпаада сына оферова, сына галаадова, сына махирова, сонма манассиина, сынов иосифовых, и сия имена их: маала и нуа, и егла и мелха и ферса, ² и ставшя пред моисеом и пред елеазаром жерцем, и пред князи и пред всем сонмом у дверий скинии свидения, глаголаша: ³ отец наш умре в пустыни, и сей не бе среде сонма воставшаго на Господа в сонме кореове, яко греха ради своего умре, и сынове не быша ему: ⁴ да не погибнет имя отца нашего от среды сонма своего, яко несть сына ему: дадите нам наследие посреде братии отца нашего. ⁵ И принесе моисей суд их пред Господа. ⁶ И рече Господь к моисею, глаголя: ⁷ право глаголаша дщери салпаадовы: даяние да даси им одержание наследия посреде братий отца их, и да приложиши им жребий отца их: ⁸ и сыном израилевым да речеши, глаголя: человек аще умрет, и не будет сына ему, дадите наследие его дщери его: ⁹ аще же дщери не будет ему, дадите наследие его брату его: ¹⁰ аще же не будут ему братия, дадите наследие брату отца его: ¹¹ аще же не будут братия отца его, дадите наследие ужику ближнему его от племене его наследити яже его: и да будет сие сыном израилевым оправдание суда, якоже заповеда Господь моисею. ¹² И рече Господь к моисею: взыди на гору, яже об ону страну иордана, сия гора навав, и виждь землю ханааню, юже аз даю сыном израилевым во одержание: ¹³ и узриши ю, и приложишися к людем своим и ты, якоже приложися аарон брат твой на горе ор: ¹⁴ понеже преступисте слово мое в пустыни син, внегда супротивитися сонму освятити мя, не освятисте мене у воды пред ними: сия есть вода пререкания в кадисе в пустыни син. ¹⁵ И рече моисей ко Господу: ¹⁶ да изберет Господь Бог духов и всякия плоти человека над сонмом сим, ¹⁷ иже изыдет пред лицем их, иже внидет пред лицем их, и иже изведет их и иже введет их, и да не будет сонм Господень, яко овцы не имущя пастыря. ¹⁸ И рече Господь к моисею, глаголя: поими к себе иисуса сына навина, человека, иже имать Духа в себе: и да возложиши руце твои на него: ¹⁹ и поставиши его пред елеазаром жерцем, и заповеждь ему пред всем сонмом, и заповеждь о нем пред ними: ²⁰ и даси на него от славы твоея, яко да послушают его вси сынове израилевы: ²¹ и пред елеазаром жерцем да станет, и да вопросят от него суда явленных пред Господем: по словеси его да исходят, и по словеси его да входят сам и сынове израилевы вкупе, и весь сонм. ²² И сотвори моисей, якоже повеле ему Господь Бог: и взем иисуса постави его пред елеазаром жерцем и пред всем сонмом: ²³ и возложи руце свои на него, и устрои его, якоже повеле Господь моисею.