¹ И приидоша сынове израилтестии, весь сонм, в пустыню син, в месяц первый, и пребываху людие в кадисе: и скончася ту мариам, и погребеся тамо. ² И не бяше воды сонму: и собрашася на моисеа и аарона, ³ и ропташа людие на моисеа, глаголюще: о , дабы умерли быхом в погибели братии нашея пред Господм: ⁴ и вскую введосте сонм Господнь в пустыню сию, погубити ны и скоты нашы? ⁵ и вскую сие? изведосте ны из египта, еже приити (нам) на место злое сие, место, в немже не сеется, ни смокви, ни винограды, ниже яблоки, ниже вода есть пити. ⁶ И прииде моисей и аарон от лица сонма пред двери скинии свидения, и падоста ниц: и явися слава Господня над ними. ⁷ И рече Господь к моисею, глаголя: ⁸ возми жезл твой и созови сонм ты и аарон, брат твой, и рцыте ко каменю пред ними, и даст воды своя: и изведете им воды из камене, и напойте сонм и скоты их. ⁹ И взя моисей жезл иже пред Господем, якоже повеле Господь. ¹⁰ И созва моисей и аарон сонм пред камень, и рече к ним: послушайте мене, непокоривии: еда из камене сего изведем вам воду? ¹¹ И воздвиг моисей руку свою, удари в камень жезлом дважды: и изыде вода многа, и напися сонм (весь) и скоты их. ¹² И рече Господь к моисею и аарону: понеже не веровасте освятити мя пред сынми израилтескими, сего ради не введете вы сонма сего в землю, юже дах им: ¹³ сия вода пререкания, яко возропташа сынове израилтестии пред Господем, и освятися в них. ¹⁴ И посла моисей послы от кадиса к царю едомскому, глаголя: тако глаголет брат твой израиль: ты веси весь труд обретший нас: ¹⁵ и снидоша отцы наши в египет, и жихом во египте дни многи, и озлобиша нас египтяне и отцев наших: ¹⁶ и возопихом ко Господу, и услыша Господь глас наш, и послав ангела, изведе ны из египта: и ныне есмы в кадисе граде, на конце предел твоих: ¹⁷ да прейдем сквозе землю твою: не пройдем сквозе села, ни сквозе винограды, ни пием воды в потоцех твоих: путем царским пойдем, не совратимся ни на десно, ни на лево, дондеже прейдем пределы твоя. ¹⁸ И рече к ним едом: не пройдеши сквозе мене: аще же ни, ратию изыду противу тебе. ¹⁹ И рекоша к нему сынове израилевы: под горою пройдем: аще же от воды твоея испием аз и скоты моя, дам цену тебе: но вещь сия ничтоже есть, под горою да пройдем. ²⁰ Он же рече: не пройдеши сквозе мене. И изыде противу им едом с народом тяжким и рукою крепкою. ²¹ И не восхоте едом дати израилю проити сквозе пределы своя, и уклонися израиль от него. ²² И воздвигошася от кадиса, и приидоша сынове израилтестии, весь сонм, в гору ор. ²³ И рече Господь к моисею и аарону в горе ор у предел земли едомли, глаголя: ²⁴ да приложится аарон к людем своим, яко не внидете в землю, юже дах сыном израилевым в наследие, понеже преогорчисте мя у воды пререкания: ²⁵ возми аарона брата твоего и елеазара сына его, и возведи я на ор гору пред всем сонмом: ²⁶ и совлецы аарону ризы его и облецы елеазара сына его, и аарон приложився да умрет тамо. ²⁷ И сотвори моисей, якоже повеле ему Господь: и возведе я на ор гору пред всем сонмом, ²⁸ и совлече аарона с риз его, и облече в ня елеазара сына его: ²⁹ и умре аарон тамо на версе горы: и сниде моисей и елеазар с горы. ³⁰ И виде весь сонм, яко умре аарон: и плакашася по аароне тридесять дний весь дом израилев.