¹ И по сих воздвигошася людие от асирофа и ополчишася в пустыни фарани. ² И рече Господь к моисею, глаголя: ³ посли от себе мужы, и да соглядают землю ханаанску, юже аз даю сыном израилевым во одержание: мужа единаго от племене, по сонмом отечеств их, да послеши их всякаго старейшину от них. ⁴ И посла я моисей от пустыни фарани глаголголом Господним: вси мужи старейшины сынов израилевых сии, и сия имена их: ⁵ от племене рувимля самуил сын закхуров: ⁶ от племене симеоня сафат сын сурин: ⁷ от племене иудина халев сын иефонниин: ⁸ от племене иссахаря игал сын иосифль: ⁹ от племене ефремля авсис сын навин: ¹⁰ от племене вениаминя фалтий сын рафуов: ¹¹ от племене завулоня гудиил сын судин: ¹² от племене иосифля сынов манассииных гадди сын сусин: ¹³ от племене данова амиил сын гамалин: ¹⁴ от племене асирова сафур сын михаиль: ¹⁵ от племене неффалимля навий сын савинь: ¹⁶ от племене гадова гудиил сын махииль. ¹⁷ Сия имена мужей, ихже посла моисей соглядати землю: и прозва моисей авсиа сына навина иисус. ¹⁸ И посла я моисей от пустыни фарани соглядати земли ханаанския, и рече к ним: взыдите пустынею сею, и взыдете на гору. ¹⁹ и узрите землю, какова есть, и люди седящыя на ней, аще сильни суть, или немощни, мало ли их есть, или много? ²⁰ и какова земля, на нейже сии седят, добра ли есть, или зла? и какови гради, в нихже живут сии, ограждени ли суть, или не ограждени? ²¹ и какова земля, изюбилна ли, или не изюбилна? суть ли на ней древеса, или ни? и укрепившеся, возмите от плодов земли. Дние же бяху весенни, предваряющии ягоды. ²² И шедше соглядаша землю от пустыни син даже да роова, до входов емаф. ²³ И идоша по пустыни, и приидоша до хеврона: и тамо (живяше) ахиман и сессий и феламин, роды енаковы: и хеврон создася седмию леты прежде танина (града) египетскаго. ²⁴ И приидоша до дебри гроздныя, и соглядаша ю: и урезаша оттуду ветвь, и грозд винограда един на ней, и воздвигоша ю на жердь, и от шипков, и от смоквей. ²⁵ И место оно назваша дебрь гроздная, грозда ради, егоже урезаша оттуду сынове израилтестии. ²⁶ И возвратишася оттуду, соглядавше землю по четыредесяти днех. ²⁷ И ходивше приидоша к моисею и аарону и ко всему сонму сынов израилевых в пустыню фараню в кадис: и поведаша им слово и всему сонму, и показаша им плод земный. ²⁸ и поведаша ему, и рекоша: ходихом на землю, на нюже посылал еси нас, на землю кипящую млеком и медом, и сий плод ея: ²⁹ кроме яко людие сильни зело, иже на ней живут, и гради утверждени ограждением велицы зело, и род енаков видехом тамо: ³⁰ и амалик живет в земли к югу: и хеттей и евей, и иевусей и аморрей живут в горах: и хананей живет при мори и при иордане реце. ³¹ И утиши халев люди пред моисеом, и рече ему: никакоже, на восходя взыдем и приимем ю в наследие, яко сильни есмы преодолети им. ³² И человецы ходившии с ним рекоша: не идем, яко не можем изыти противу языку (сему), яко крепльший есть паче нас. ³³ И изнесоша ужас земли, юже соглядаша, к сыном израилевым, глаголюще: землю юже проидохом соглядающе, земля есть поядающи живущыя на ней, и вси люди, ихже видехом на ней, мужи превысоцыи: ³⁴ и тамо видехом исполины, сыны енаковы, и бехом пред ними яко прузи, и тако бехом пред ними.