¹ И быша людие ропщуще злая пред Господем: и слыша Господь и разгневася гневом, и разгореся в них огнь от Господа и потреби часть некую от полка. ² И возопиша людие к моисею: и помолися моисей к Господу, и преста огнь. ³ И прозвася имя месту тому запаление: яко разгореся в них огнь от Господа. ⁴ И общий народ иже в них похотеша похотением: и седше плакахуся сынове израилевы и рекоша: кто ны напитает мясы? ⁵ помянухом рыбы, яже ядохом в земли египетстей туне, и огурцы и дыни, лук и червленый лук и чеснок: ⁶ ныне же душа наша изсохла, ничтоже точию манна пред очима нашима. ⁷ Манна же бяше аки семя кориандрово, и вид ея яко вид кристалла: ⁸ и исхождаху людие и собираху, и меляху в жерновах и толцаху в ступах, и варяху в горшках и творяху из нея потребники: и бяше вкус ея, яко вкус муки пряжены с елеем: ⁹ и егда схождаше роса на полк нощию, схождаше манна нань. ¹⁰ И услыша моисей плачущихся их в сонмех своих, коегождо их пред своими дверми: и разгневася Господь гневом зело, и пред моисеом бяше зло. ¹¹ И рече моисей ко Господу: вскую озлобил еси раба твоего? и почто не обретох благодати пред тобою, еже возложити устремление людий сих на мя? ¹² еда аз во утробе зачах вся люди сия? или аз родих я? яко глаголеши ми: возми их в недра твоя, якоже доилица носит доимыя, в землю, еюже клялся еси отцем их: ¹³ откуду мне мяса дати всем людем сим? яко плачут на мя, глаголюще: даждь нам мяса, да ядим: ¹⁴ не возмогу аз един водити людий сих, яко тяжко мне есть слово сие: ¹⁵ аще же тако ты твориши мне, то убий мя убиением, аще обретох благодать пред тобою, да не вижу озлобления моего. ¹⁶ И рече Господь к моисею: собери ми седмьдесят мужей от старец израилевых, ихже ты сам веси, яко тии суть старцы людстии и книгочия их: и да приведеши я ко скинии свидения, и да станут тамо с тобою: ¹⁷ и сниду и возглаголю тамо с тобою, и уйму от духа, иже в тебе, и возложу на ня: да подимут с тобою устремление людий, и не будеши водити их ты един: ¹⁸ и людем речеши: очиститеся наутрие, и снесте мяса, яко плакастеся пред Господем, глаголюще: кто ны напитает мясы? яко добро нам бысть во египте: и даст Господь вам мяса ясти, и снесте мяса: ¹⁹ не един день ясти будете, ни два, ни пять дний, ни десять дний, ниже двадесять дний: ²⁰ до месяца дний ясти будете, дондеже изыдет из ноздрий ваших: и будет вам в мерзость, яко не покористеся Господу, иже есть в вас, и плакастеся пред ним, глаголюще: вскую бе нам изыти из египта? ²¹ И рече моисей: шесть сот тысящ пеших людий, в нихже аз есмь, и ты рекл еси: мяса им дам ясти, и будут ясти месяц дний: ²² еда овцы и волы заколются им, и доволно будет им? или вся рыбы морския соберутся им, и доволно будет им? ²³ И рече Господь к моисею: еда рука Господня не доволна будет? ныне уразумееши, аще постигнет тя слово мое, или ни. ²⁴ И изыде моисей и глагола людем словеса Господня: и собра седмьдесят мужей от старец людских, и постави я окрест скинии. ²⁵ И сниде Господь во облаце и глагола к нему: и уя от духа, иже на нем, и возложи на седмьдесят мужей старец: егда же препочи дух на них, и пророчествоваша, и ктому не приложиша. ²⁶ И осташася два мужа в полце: имя единому елдад, и имя второму модад: и препочи на них дух. И сии беша от вписанных, и не приидоша ко скинии, и пророчествоваша в полце. ²⁷ И притек юноша возвести моисею, и рече, глаголя: елдад и модад пророчествуют в полцех. ²⁸ И отвещав иисус навин, предстояй моисею избранный ему, рече господи мой моисею, запрети им. ²⁹ И рече ему моисей: еда ревнуеши ты мне? и кто даст всем людем Господним (быти) пророки, егда даст Господь Духа своего на них? ³⁰ И иде моисей в полк сам и старцы израилтестии. ³¹ И дух изыде от Господа, и изведе крастели из моря и наведе на полк день ходу отсюду и день ходу отюнуду, окрест полка яко на два лактя от земли. ³² И воставше людие весь день и всю нощь, и весь день наутрие, и собраша крастели: иже мало, собра десять спуд: и иссушиша себе сушаницы окрест полка. ³³ И мяса бяху им еще в зубех их, прежде оскудения, и Господь разгневася зело на люди, и порази Господь люди язвою великою зело: ³⁴ и прозвася имя месту тому гробы похотения: яко тамо погребоша людий похотевших. ³⁵ (И) воздвигошася людие от гробов похотения во асироф, и быша людие во асирофе.