¹ И рече Господь к моисею, глаголя: ² сотвори себе две трубы сребряны: кованы сотвориши я, и будут тебе на созвание сонма и возставляти полки: ³ и да вострубиши ими, и да соберется к тебе весь сонм пред двери скинии свидения ⁴ аще же единою трубою вострубят, да приидут к тебе вси князи и тысященачалники израилтестии: ⁵ и вострубите в знамение, и воздвигнутся полцы ополчающиися на востоки: ⁶ и вострубите в знамение второе, и воздвигнутся полцы ополчающиися от юга: и вострубите в знамение третие, и да воздвигнутся полцы ополчающиися от моря: и вострубите в знамение четвертое, и воздвигнутся полцы ополчающиися от севера: знамением да вострубят в воздвижение их. ⁷ И егда соберете сонм, вострубите, не в знамение. ⁸ И сынове аарони жерцы да вострубят трубами: и да будет вам законно вечно в роды вашя. ⁹ Аще же изыдете на брань в земли вашей к супостатом супротивящымся вам, и вострубите и назнаменуйте трубами, и воспомянетеся пред Господем и избавитеся от враг ваших. ¹⁰ И во днех веселия вашего и в праздницех ваших и в новомесячиих ваших вострубите трубами на всесожжения и на жертвы спасений ваших, и будет вам воспоминание пред Богом вашим: аз Господь Бог ваш. ¹¹ И бысть во второе лето, во вторый месяц, в двадесятый месяца, вознесеся облак от скинии свидения, ¹² и воздвигошася сынове израилевы со имениями своими от пустыни синайския, и ста облак в пустыни фарани. ¹³ И воздвигошася первии по гласу Господню рукою моисеовою: ¹⁴ и воздвигоша знамя полка сынов иудиных первии с силою своею: и над силою их наассон сын аминадавль: ¹⁵ и над силою племене сынов иссахаровых нафанаил сын согаров: ¹⁶ и над силою племене сынов завулоних елиав сын хелонь. ¹⁷ И сложиша скинию, и воздвигоша сынове гирсони и сынове мерарины, носящии скинию. ¹⁸ И воздвигоша знамя полка рувимля с силою своею: и над силою их елисур сын седиуров: ¹⁹ и над силою племене сынов симеоних саламиил сын сурисадаев: ²⁰ и над силою племене сынов гадовых елисаф сын рагуилев: ²¹ И воздвигошася сынове каафовы, воздвизающии святая: и поставиша скинию, дондеже приидоша. ²² И воздвигоша знамя полка ефремля с силою своею: и над силою их елисама сын емиудов: ²³ и над силою племене сынов манассииных гамалиил сын фадассуров: ²⁴ и над силою племене сынов вениаминих авидан сын гадеонин. ²⁵ И воздвигоша знамя полка сынов дановых, последнии всех полков с силою своею: и над силою их ахиезер сын амисадаев: ²⁶ и над силою племене сынов асировых фагаиил сын ехрань: ²⁷ и над силою племене сынов неффалимлих ахирей сын енань. ²⁸ Сии полцы сынов израилевых, и воздвигошася с силою своею. ²⁹ И рече моисей иоваву сыну рагуилеву мадианитину, тестю моисеову: воздвизаемся мы на место, о немже Господь рече: сие дам вам: пойди с нами, и сотворим тебе добро, яко Господь добрая глагола о израили. ³⁰ И отвеща к нему: не пойду, но в землю мою и в род мой иду. ³¹ И рече: не остави нас, понеже был еси с нами в пустыни, и будеши в нас старейшина: ³² и будет аще пойдеши с нами, и будут благая оная, елика благосотворит Господь нам, благосотворим и тебе. ³³ И отидоша от горы Господни в путь трех дний: и кивот завета Господня предидяше пред ними в путь трех дний, соглядати им стана. ³⁴ И бысть егда воздвизаху кивот, и рече моисей: востани, Господи, и да разсыплются врази твои, и да бежат вси ненавидящии тебе. ³⁵ И в поставлении (кивота) рече: возвращай, Господи, тысящы тем во израили. ³⁶ И облак Господнь бысть осеняющь над ними в день, егда воздвизахуся из полка.