¹ И воздвижеся весь сонм сынов израилевых от пустыни син по полком своим словом Господним и ополчишася в рафидине. Не бяше же воды людем пити, ² и хуляху людие моисеа, глаголюще: даждь нам воду, да пием. И рече им моисей: что хулите мя? и что искушаете Господа? ³ Возжаждаша же тамо людие воды и роптаху на моисеа, глаголюще: вскую сие? извел еси нас из египта уморити нас и чада наша и скоты жаждею? ⁴ Возопи же моисей ко Господу глаголя: что сотворю людем сим? еще мало, и побиют мя камением. ⁵ И рече Господь к моисею: пойди пред людьми сими, и поими с собою от старец людских, и жезл, имже пресекл еси море, возми в руку твою, и пойди: ⁶ аз же стану тамо прежде пришествия твоего у камене в хориве: и удариши в камень, и изыдет из него вода, и да пиют людие. Сотвори же моисей тако пред сыны израилевыми, ⁷ и прозва имя месту тому искушение и похуление, хулы ради сынов израилевых, и занеже искусиша Господа, глаголюще: аще есть в нас Господь, или ни? ⁸ Прииде же амалик и воева на израиля в рафидине. ⁹ Рече же моисей ко иисусу: избери себе мужы сильны и изшед ополчися на амалика заутра: и се, аз стану на верху горы, и жезл Божий в руце моей. ¹⁰ И сотвори иисус, якоже рече ему моисей, и изшед ополчися на амалика: моисей же и аарон и ор взыдоша на верх горы. ¹¹ И бысть егда воздвизаше моисей руце, одолеваше израиль: егда же опускаше руце, одолеваше амалик: ¹² руце же моисеовы тяжки беша: и вземше камень, подложиша ему, и седяше на нем: аарон же и ор поддержаста руце ему, един отсюду, а другий оттуду: и быша моисеови руце укреплены до захождения солнца: ¹³ и преодоле иисус амалика и вся люди его убийством меча. ¹⁴ Рече же Господь к моисею: впиши сие на память в книги и вдай во ушы иисусу, яко пагубою погублю память амаликову от поднебесныя. ¹⁵ И созда моисей олтарь Господу и прозва имя ему Господь прибежище мое: ¹⁶ яко рукою тайною ратует Господь на амалика от рода в род.