¹ Христу убо пострадавшу за ны Плотию, и вы в ту же мысль вооружитеся: зане пострадавый плотию, преста от греха, ² во еже не ктому человеческим похотем, но воли Божией прочее во плоти жити время. ³ Довлеет бо вам мимошедшее время жития, волю языческую творившым, хождшым в нечистотах, в похотех, в мужеложстве, в скотоложстве, в помыслех, в пиянстве, в козлогласованиих, в лихоимании и богомерзких идолослужениих: ⁴ о немже дивятся, не сходящымся вам в тоже блуда разлияние, хуляще: ⁵ иже воздадят слово готову сущему судити живым и мертвым. ⁶ На се бо и мертвым благовестися, да суд убо приимут по человеку плотию, поживут же по Бозе Духом. ⁷ Всем же кончина приближися. Уцеломудритеся убо и трезвитеся в молитвах. ⁸ Прежде же всех друг ко другу любовь прилежну имейте, зане любовь покрывает множество грехов. ⁹ Страннолюбцы друг ко другу, без роптании. ¹⁰ Кийждо якоже прият дарование, между себе сим служаще, яко добрии строителие различныя благодати Божия. ¹¹ Аще кто глаголет, яко словеса Божия: аще кто служит, яко от крепости, юже подает Бог: да о всем славится Бог Иисус Христом, емуже есть слава и держава во веки веков. Аминь. ¹² Возлюбленнии, не дивитеся еже в вас раждежению ко искушению вам бываему, яко чужду вам случающуся: ¹³ но понеже приобщаетеся Христовым страстем, радуйтеся, яко да и в явление славы его возрадуетеся веселящеся. ¹⁴ Аще укоряеми бываете о имени Христове, блажени есте яко славы и Божий Дух на вас почивает: онеми убо хулится, а вами прославляется. ¹⁵ Да не кто убо от вас постраждет яко убийца, или яко тать, или яко злодей, или яко чуждопосетитель: ¹⁶ аще ли же яко Христианин, да не стыдится, да прославляет же Бога в части сей. ¹⁷ Яко время начати суд от дому Божия: аще же прежде от вас, кая кончина противящымся Божию Евангелию? ¹⁸ И аще праведник едва спасется, нечестивый и грешный где явится? ¹⁹ Темже и страждущии по воли Божией, яко верну зиждителю да предадят душы своя во благотворении.