¹ Такожде же и жены, повинующяся своим мужем, да и аще нецыи не повинуются слову, женским житием без слова пленени будут, ² видевше еже со страхом чисто житие ваше. ³ умже да будет не внешняя, плетения влас и обложения злата, или одеяния риз, лепота, ⁴ но потаеный сердца человек, в неистлении кроткаго и молчаливаго духа, еже есть пред Богом многоценно. ⁵ Тако бо иногда и святыя жены, уповающыя на Бога, украшаху себе, повинующяся своим мужем: ⁶ якоже сарра послушаше авраама, господина того зовущи: еяже бысте чада, благотворящя и не боящяся ни единаго страха. ⁷ Мужие такожде, вкупе живуще со своими женами по разуму, яко немощнейшу сосуду женскому воздающе честь, яко и снаследницы благодатныя жизни, во еже не прекращатися молитвам вашым. ⁸ Конец же, вси единомудрени будите, милостиви, братолюбцы, милосердни, благоутробни, мудролюбцы, смиреномудри: ⁹ не воздающе зла за зло, или досаждения за досаждение: супротивное же, благословяще, ведяще, яко на се звани бысте, да благословение наследите. ¹⁰ Хотяй бо живот любити и видети дни благи, да удержит язык свой от зла, и устне свои еже не глаголати льсти. ¹¹ Да уклонится от зла, и да сотворит благо, да взыщет мира и да держится его: ¹² зане очи Господни на праведныя, и ушы его в молитву их, лице же Господне на творящыя злая, еже потребити их от земли. ¹³ И кто озлобит вас, аще благому подобницы будете? ¹⁴ Но аще и страждете правды ради, блажени есте: страха же их не убойтеся, ниже смущайтеся. ¹⁵ Господа же Бога освятите в сердцах ваших: готови же присно ко ответу всякому вопрошающему вы словесе о вашем уповании, с кротостию и страхом: ¹⁶ совесть имуще благу, да о немже клевещут вас аки злодеев, постыдятся злословящии ваше благое о Христе житие. ¹⁷ Лучше бо есть благое творящым, аще хощет воля Божия, пострадати, нежели зло творящым: ¹⁸ зане и Христос единою о гресех наших пострада, праведник за неправедники, да приведет ны Богови, умерщвлен убо быв Плотию, ожив же Духом: ¹⁹ о немже и сущым в темнице духовом сошед проповеда, ²⁰ противльшымся иногда, егда ожидаше Божие долготерпение, во дни ноевы, делаему ковчегу, в немже мало, сиречь осмь душ, спасошася от воды. ²¹ Егоже воображение ныне и нас спасает крещение, не плотския отложение скверны, но совести благи вопрошение у Бога, воскресением Иисус Христовым, ²² иже есть о десную Бога, возшед на небо, покоршымся ему ангелом и властем и силам.