¹ Темже оставльше начала Христова слово, на совершение да ведемся, не паки основание покаяния полагающе от мертвых дел, и веры в Бога, ² крещений учения, возложения же рук, воскресения же мертвых и суда вечнаго. ³ И сие сотворим, аще Бог повелит. ⁴ Невозможно бо просвещенных единою и вкусивших дара небеснаго, и причастников бывших духа святаго, ⁵ и добраго вкусивших Божия глаголгола и силы грядущаго века, ⁶ и отпадших, паки обновляти в покаяние, второе распинающих Сына Божия себе и обличающих. ⁷ Земля бо пившая сходящий на ню множицею дождь и раждающая былия добрая оным, имиже и делаема бывает, приемлет благословение от Бога: ⁸ а износящая терния и волчец непотребна есть и клятвы близ, еяже кончина в пожжение. ⁹ Надеемся же о вас, возлюбленнии, лучших и придержащихся спасения, аще и тако глаголем. ¹⁰ Не обидлив бо Бог, забыти дела вашего и труда любве, юже показасте во имя его, послуживше святым и служаще. ¹¹ Желаем же, да кийждо вас являет тожде тщание ко извещению упования даже до конца, ¹² да не лениви будете, но подражателе наследствующих обетования верою и долготерпением. ¹³ Аврааму бо обетовая Бог, понеже ни единем имяше болшим клятися, клятся собою, ¹⁴ глаголя: воистинну благословя благословлю тя и умножая умножу тя. ¹⁵ И тако долготерпев, получи обетование. ¹⁶ Человецы бо болшим кленутся, и всякому их прекословию кончина во извещение клятва (есть). ¹⁷ В немже лишше хотя Бог показати наследником обетования непреложное совета своего, ходатайствова клятвою: ¹⁸ да двема вещьми непреложными, в нихже невозможно солгати Богу, крепкое утешение имамы прибегшии ятися за предлежащее упование, ¹⁹ еже аки котву имамы души, тверду же и известну, и входящую во внутреннейшее завесы, ²⁰ идеже предтеча о нас вниде Иисус, по чину мелхиседекову первосвященник быв во веки.