¹ Темже, братие святая, звания небеснаго причастницы, разумейте посланника и святителя исповедания нашего Иисуса Христа, ² верна суща сотворшему его, якоже и моисей во всем дому его. ³ Множайшей бо славе сей паче моисеа сподобися, елико множайшую честь имать паче дому сотворивый его: ⁴ всяк бо дом созидается от некоего: а сотворивый всяческая Бог. ⁵ И моисей убо верен бе во всем дому его, якоже слуга, во свидетелство глаголатися имевшым: ⁶ Христос же якоже Сын в дому своем: егоже дом мы есмы, аще дерзновение и похвалу упования даже до конца известно удержим. ⁷ Темже, якоже глаголет дух святый, днесь, аще глас его услышите, ⁸ не ожесточите сердец ваших, якоже в прогневании, во дни искушения в пустыни, ⁹ идеже искусиша мя отцы ваши, искусиша мя и видеша дела моя четыредесять лет. ¹⁰ Сего ради негодовах рода того и рех: присно заблуждают сердцем, тии же не познаша путий моих: ¹¹ яко кляхся во гневе моем, аще внидут в покой мой. ¹² Блюдите, братие, да не когда будет в некоем от вас сердце лукаво, (исполнено) неверия, во еже отступити от Бога жива. ¹³ Но утешайте себе на всяк день дондеже днесь нарицается, да не ожесточится некто от вас лестию греховною: ¹⁴ причастницы бо быхом Христу, аще точию начаток состава даже до конца известен удержим: ¹⁵ внегда глаголет: днесь, аще глас его услышите, не ожесточите сердец ваших, якоже в прогневании. ¹⁶ Нецыи бо слышавше прогневаша, но не вси изшедшии из египта с моисеом. ¹⁷ Коих же негодова четыредесять лет? Не согрешивших ли, ихже кости падоша в пустыни? ¹⁸ Которым же клялся не внити в покоище его? Яве, яко противльшымся. ¹⁹ И видим, яко не возмогоша внити за неверствие.