¹ Ты убо, чадо мое, возмогай во благодати, яже о Христе Иисусе, ² и яже слышал еси от мене многими свидетели, сия предаждь верным человеком, иже доволни будут и иных научити. ³ Ты убо злопостражди яко добр воин Иисус Христов. ⁴ Никтоже (бо) воин бывая обязуется куплями житейскими, да воеводе угоден будет. ⁵ Аще же и постраждет кто, не венчается, аще не законно мучен будет. ⁶ Труждающемуся делателю прежде подобает от плода вкусити. ⁷ Разумей, яже глаголю: да даст убо тебе Господь разум о всем. ⁸ Поминай (Господа) Иисуса Христа воставшаго от мертвых, от семене давидова, по благовествованию моему, ⁹ в немже злостражду даже до уз, яко злодей: но слово Божие не вяжется. ¹⁰ Сего ради вся терплю избранных ради, да и тии спасение улучат еже о Христе Иисусе, со славою вечною. ¹¹ Верно слово: аще бо с ним умрохом, то с ним и оживем: ¹² аще терпим, с ним и воцаримся: аще отвержемся, и той отвержется нас: ¹³ аще не веруем, он верен пребывает: отрещися бо себе не может. ¹⁴ Сия воспоминай, засвидетелствуя пред Господем, не словопретися, ни на куюже потребу, на разорение слышащих. ¹⁵ Потщися себе искусна поставити пред Богом, делателя непостыдна, право правяща слово истины. ¹⁶ Скверных же тщегласий отметайся: наипаче бо преспеют в нечестие, ¹⁷ и слово их яко гаггрена жир обрящет: от нихже есть именей и филит, ¹⁸ иже о истине погрешиста, глаголюща, яко воскресение уже бысть: и возмущают некоторых веру. ¹⁹ Твердое убо основание Божие стоит, имущее печать сию: позна Господь сущыя своя, и: да отступит от неправды всяк именуяй имя Господне. ²⁰ В велицем же дому не точию сосуди злати и сребряни суть, но и древяни и глиняни: и ови убо в честь, ови же не в честь. ²¹ Аще убо кто очистит себе от сих, будет сосуд в честь, освящен и благопотребен Владыце, на всякое дело благое уготован. ²² Похотей юных бегай, держися же правды, веры, любве, мира со всеми призывающими Господа от чистаго сердца. ²³ Буих же и ненаказанных стязаний отрицайся, ведый, яко раждают свары: ²⁴ рабу же Господню не подобает сваритися, но тиху быти ко всем, учителну, незлобиву, ²⁵ с кротостию наказующу противныя, еда како даст им Бог покаяние в разум истины, ²⁶ и возникнут от диаволския сети, живи уловлени от него в свою его волю.