¹ Молю убо прежде всех творити молитвы, моления, прошения, блгодарения за вся человеки, ² за царя и за всех, иже во власти суть, да тихое и безмолвное житие поживем во всяцем благочестии и чистоте: ³ сие бо добро и приятно пред спасителем нашим Богом, ⁴ иже всем человеком хощет спастися и в разум истины приити. ⁵ Един бо есть Бог, и един ходатай Бога и человеков, Человек Христос Иисус, ⁶ давый себе избавление за всех: свидетелство времены своими, ⁷ в неже поставлен бых аз проповедник и апостол, истину глаголю о Христе, не лгу, учитель языков в вере и истине. ⁸ Хощу убо, да молитвы творят мужие на всяцем месте, воздеюще преподобныя руки без гнева и размышления: ⁹ такожде и жены во украшении лепотнем, со стыдением и целомудрием да украшают себе не в плетениих, ни златом, или бисерми, или ризами многоценными, ¹⁰ но, еже подобает женам обещавающымся благочестию, делы благими. ¹¹ Жена в безмолвии да учится со всяким покорением: ¹² жене же учити не повелеваю, ниже владети мужем, но быти в безмолвии. ¹³ Адам бо прежде создан бысть, потом же ева: ¹⁴ и адам не прельстися, жена же прельстившися, в преступлении бысть: ¹⁵ спасется же чадородия ради, аще пребудет в вере и любви и во святыни с целомудрием.