¹ Молим же вы, братие, о пришествии Господа нашего Иисуса Христа и нашем собрании о нем, ² не скоро подвизатися вам от ума, ни ужасатися ниже духом, ниже словом, ни посланием аки от нас посланным, яко уже настоит день Христов. ³ Да никтоже вас прельстит ни по единому же образу: яко аще не приидет отступление прежде, и открыется человек беззакония, сын погибели, ⁴ противник и превозносяйся паче всякаго глаголемаго бога или чтилища, якоже ему сести в церкви Божией аки богу, показующу себе, яко бог есть. ⁵ Не помните ли, яко еще живый у вас, сия глаголах вам? ⁶ И ныне удержавающее весте, во еже явитися ему в свое ему время. ⁷ Тайна бо уже деется беззакония, точию держяй ныне дондеже от среды будет: ⁸ и тогда явится беззаконник, егоже Господь Иисус убиет духом уст своих, и упразднит явлением пришествия своего, ⁹ егоже есть пришествие по действу сатанину во всяцей силе и знамениих и чудесех ложных, ¹⁰ и во всякой льсти неправды в погибающих, зане любве истины не прияша, во еже спастися им. ¹¹ И сего ради послет им Бог действо льсти, во еже веровати им лжи, ¹² да суд приимут вси не веровавшии истине, но благоволившии в неправде. ¹³ Мы же должни есмы благодарити Бога всегда о вас, братие возлюбленная от Господа, яко избрал есть вас Бог от начала во спасение во святыни духа и веры истины, ¹⁴ в неже призва вас благовествованием нашим, в получение славы Господа нашего Иисуса Христа. ¹⁵ Темже убо, братие, стойте и держите предания, имже научистеся или словом, или посланием нашим. ¹⁶ Сам же Господь наш Иисус Христос, и Бог и Отец наш, возлюбивый нас и давый утешение вечно и упование благо в благодати, ¹⁷ да утешит сердца ваша и да утвердит во всяцем слове и деле блазе.