¹ Третицею се гряду к вам: при устех двою или триех свидетелей станет всяк глагол. ² Прежде рех и предглаголю, яко у вас быв второе, и отсутствуя ныне пишу прежде согрешившым и прочым всем, яко аще прииду паки, не пощажду: ³ понеже искушения ищете глаголющаго во мне Христа, иже в вас не изнемогает, но может в вас: ⁴ ибо аще и распят бысть от немощи, но жив есть от силы Божия: ибо и мы немощствуем в нем, но живи будем с ним от силы Божия в вас: ⁵ Себе искушайте, аще есте в вере: себе искушайте. Или не знаете себе, яко Иисус Христос в вас есть? Разве точию чим неискусни есте. ⁶ Уповаю же, яко разумети имате, яко мы несмы неискусни. ⁷ Молимся же к Богу, не сотворити вам ни единаго зла, не яко да мы искусни явимся, но да вы доброе сотворите, мы же яко неискусни будем. ⁸ Ничтоже бо можем на истину, но по истине. ⁹ Радуемся бо, егда мы немощствуем, вы же сильни бываете: о сем же и молимся, о вашем совершении. ¹⁰ Сего ради не сый у вас сия пишу, да не пришед безщадно сотворю по власти, юже Господь дал ми есть в создание, а не на разорение. ¹¹ Прочее же, братие, радуйтеся, совершайтеся, утешайтеся, тожде мудрствуйте, мир имейте. И Бог любве и мира будет с вами. ¹² Целуйте друг друга лобзанием святым. ¹³ Целуют вы святии вси. ¹⁴ Благодать Господа нашего Иисуса Христа, и любы Бога и оца, и общение святаго духа со всеми вами. Аминь.