¹ И якоже суждено бысть отплыти нам во италию, предаху павла же и иныя некия юзники сотнику, именем иулию, спиры севастийския. ² Вшедше же в корабль адрамитский, восхотевше плыти во асийская места, отвезохомся, сущу с нами аристарху македонянину от солуня. ³ В другий же пристахом в сидоне: человеколюбие же иулий павлови дея, повеле к другом шедшу прилежание улучити. ⁴ И оттуду отвезшеся приплыхом в кипр, зане ветри бяху противни: ⁵ пучину же, яже противу киликии и памфилии, преплывше, приидохом в миры ликийския. ⁶ И тамо обрет сотник корабль александрийский пловущь во италию, всади ны в онь. ⁷ Во многи же дни косно плавающе и едва бывше противу книда, не оставляющу нас ветру, приплыхом под крит при салмоне: ⁸ едва же избирающе край, приидохом на место некое, нарицаемое доброе пристанище, емуже близ бе град ласей. ⁹ Многу же времени минувшу и сущу уже небезбедну плаванию, занеже и пост уже бе прешел, советоваше павел, ¹⁰ глаголя им: мужие, вижду, яко с досаждением и многою тщетою не токмо бремене и корабля, но и душ наших хощет быти плавание. ¹¹ Сотник же кормчия и навклира послушаше паче, нежели павлом глаголемых. ¹² Не добру же пристанищу сущу ко озимению, мнози совет даяху отвезтися оттуду, аще како возмогут, достигше финикии, озимети в пристанищи критстем, зрящем к ливу и к хору. ¹³ Дхнувшу же югу, мневше волю свою улучити, воздвигше ветрила, плыху вскрай крита. ¹⁴ Не по мнозе же возвея противен ему ветр бурен, нарицаемый евроклидон. ¹⁵ Восхищену же бывшу кораблю и не могущу сопротивитися ветру, вдавшеся волнам носими бехом. ¹⁶ Остров же некий мимотекше, нарицающься клавдий, едва возмогохом удержати ладию: ¹⁷ юже востягше, всяким образом помогаху, подтверждающе корабль: боящеся же, да не в сирть впадут, низпустивше парус, сице носими беху. ¹⁸ Вельми же обуреваемым нам, на утрие изметание творяху, ¹⁹ и в третий день своими руками ядрило корабленое извергохом. ²⁰ Ни солнцу же, ни звездам явльшымся на многи дни, и зиме не мале належащей, прочее отимашеся надежда вся, еже спастися нам. ²¹ Многу же неядению сущу, тогда став павел посреде их, рече: подобаше убо, о, мужие, послушавше мене, не отвезтися от крита и избыти досаждения сего и тщеты: ²² и се, ныне молю вы благодушствовати, погибель бо ни единей души от вас будет, разве корабля: ²³ предста бо ми в сию нощь ангел Бога, егоже аз есмь, емуже и служу, ²⁴ глаголя: не бойся, павле, кесарю ти подобает предстати, и се, дарова тебе Бог вся плавающыя с тобою. ²⁵ Темже дерзайте, мужие, верую бо Богови, яко тако будет, имже образом речено ми бысть: ²⁶ во остров же некий подобает нам пристати. ²⁷ И егда четвертаянадесять нощь бысть, носимым нам во адриатстей (пучине), в полунощи непщеваху корабленицы, яко приближаются к некоей стране, ²⁸ и измеривше глубину обретоша саженей двадесять: мало же прешедше и паки измеривше, обретоша саженей пятьнадесять. ²⁹ Боящеся же, да не како в прудная места впадут, от носа корабля вергше котвы четыри, моляхомся, да день будет. ³⁰ Кораблеником же ищущым бежати из корабля и низвесившым ладию в море, изветом аки от носа хотящым котвы простерти, ³¹ рече павел сотнику и воином: аще не сии пребудут в корабли, вы спастися не можете. ³² Тогда воини отрезаша ужя ладии и оставиша ю отпасти. ³³ Егда же хотяше день быти, моляше павел всех, да приимут пищу, глаголя: четыренадесятый днесь день ждуще, не ядше пребываете, ничтоже вкусивше: ³⁴ темже молю вас прияти пищу, се бо к вашему спасению есть: ни единому бо от вас влас главы отпадет. ³⁵ Рек же сия и приемь хлеб, благодари Бога пред всеми и преломль начат ясти. ³⁶ Благонадежни же бывше вси, и тии прияша пищу: ³⁷ бе же в корабли всех душ двесте седмьдесят и шесть. ³⁸ Насыщшеся же брашна, облегчиша корабль, изметающе пшеницу в море. ³⁹ Егда же день бысть, земли не познаваху: недро же некое усмотреша имущее песок, в неже, аще мощно есть, совещаша извлещи корабль. ⁴⁰ И котвы собравше, везяхуся по морю: купно ослабивше ужя кормилом и воздвигше малое ветрило к дышущему ветрецу, везохомся на край. ⁴¹ Впадше же в место исопное, увязиша корабль: и нос убо увязший пребысть недвижимь, кормило же разбивашеся от нужды волн. ⁴² Воином же совет бысть, да узники убиют, да не кто поплыв избегнет. ⁴³ Сотник же, хотя соблюсти павла, возбрани совету их, повеле же могущым плавати, да изскочивше первее изыдут на край, ⁴⁴ а прочии, ови убо на дщицах, ови же на нечем от корабля. И тако бысть всем спастися на землю.