¹ Сия глагола Иисус и возведе очи свои на небо и рече: Отче, прииде час: прослави Сына твоего, да и Сын твой прославит тя: ² якоже дал еси ему власть всякия плоти, да всяко, еже дал еси ему, даст им живот вечный: ³ се же есть живот вечный, да знают тебе единаго истиннаго Бога, и егоже послал еси Иисус Христа. ⁴ Аз прославих тя на земли, дело соверших, еже дал еси мне да сотворю: ⁵ и ныне прослави мя ты, Отче, у тебе самого славою, юже имех у тебе прежде мир не бысть. ⁶ Явих имя твое человеком, ихже дал еси мне от мира: твои беша, и мне их дал еси, и слово твое сохраниша: ⁷ ныне разумеша, яко вся, елика дал еси мне, от тебе суть: ⁸ яко глаголголы, ихже дал еси мне, дах им, и тии прияша и разумеша воистинну, яко от тебе изыдох, и вероваша, яко ты мя послал еси. ⁹ Аз о сих молю: не о (всем) мире молю, но о тех, ихже дал еси мне, яко твои суть: ¹⁰ и моя вся твоя суть, и твоя моя: и прославихся в них: ¹¹ и ктому несмь в мире, и сии в мире суть, и аз к тебе гряду. Отче святый, соблюди их во имя твое, ихже дал еси мне, да будут едино, якоже (и) мы. ¹² Егда бех с ними в мире, аз соблюдах их во имя твое: ихже дал еси мне, сохраних, и никтоже от них погибе, токмо сын погибельный, да сбудется писание: ¹³ ныне же к тебе гряду, и сия глаголю в мире, да имут радость мою исполнену в себе. ¹⁴ Аз дах им слово твое, и мир возненавиде их, яко не суть от мира, якоже (и) аз от мира несмь: ¹⁵ не молю, да возмеши их от мира, но да соблюдеши их от неприязни: ¹⁶ от мира не суть, якоже (и) аз от мира несмь: ¹⁷ святи их во истину твою: слово твое истина есть. ¹⁸ Якоже мене послал еси в мир, и аз послах их в мир, ¹⁹ и за них аз свящу себе, да и тии будут священи во истину. ²⁰ Не о сих же молю токмо, но и о верующих словесе их ради в мя, ²¹ да вси едино будут: якоже ты, Отче, во мне, и аз в тебе, да и тии в нас едино будут: да (и) мир веру имет, яко ты мя послал еси: ²² и аз славу, юже дал еси мне, дах им: да будут едино, якоже мы едино есма: ²³ аз в них, и ты во мне: да будут совершени во едино, и да разумеет мир, яко ты мя послал еси и возлюбил еси их, якоже мене возлюбил еси. ²⁴ Отче, ихже дал еси мне, хощу, да идеже есмь аз, и тии будут со мною, да видят славу мою, юже дал еси мне, яко возлюбил мя еси прежде сложения мира. ²⁵ Отче праведный, и мир тебе не позна, аз же тя познах, и сии познаша, яко ты мя послал еси: ²⁶ и сказах им имя твое, и скажу, да любы, еюже мя еси возлюбил, в них будет, и аз в них.