¹ И мимоидый виде человека слепа от рождества. ² И вопросиша его ученицы его, глаголюще: равви, кто согреши, сей ли, или родителя его, яко слеп родися? ³ Отвеща Иисус: ни сей согреши, ни родителя его, но да явятся дела Божия на нем: ⁴ мне подобает делати дела пославшаго мя, дондеже день есть: приидет нощь, егда никтоже может делати: ⁵ егда в мире есмь, свет есмь миру. ⁶ Сия рек, плюну на землю, и сотвори брение от плюновения, и помаза очи брением слепому, ⁷ и рече ему: иди, умыйся в купели силоамсте, еже сказается послан. Иде убо и умыся, и прииде видя. ⁸ Соседи же и иже бяху видели его прежде, яко слеп бе, глаголаху: не сей ли есть седяй и просяй? ⁹ Овии глаголаху, яко сей есть: инии же (глаголаху), яко подобен ему есть. Он (же) глаголаше, яко аз есмь. ¹⁰ Глаголаху же ему: како ти отверзостеся очи? ¹¹ Отвеща он и рече: Человек нарицаемый Иисус брение сотвори и помаза очи мои и рече ми: иди в купель силоамлю и умыйся. Шед же и умывся, прозрех. ¹² Реша убо ему: кто той есть? Глагола: не вем. ¹³ Ведоша (же) его к фарисеом, иже бе иногда слеп. ¹⁴ Бе же суббота, егда сотвори брение Иисус и отверзе ему очи. ¹⁵ Паки же вопрошаху его и фарисее, како прозре. Он же рече им: брение положи мне на очи, и умыхся, и вижу. ¹⁶ Глаголаху убо от фарисей нецыи: несть сей от Бога Человек, яко субботу не хранит. Овии глаголаху: како может человек грешен сицева знамения творити? И распря бе в них. ¹⁷ Глаголаху (убо) слепцу паки: ты что глаголеши о нем, яко отверзе очи твои? Он же рече, яко пророк есть. ¹⁸ Не яша убо веры иудее о нем, яко слеп бе и прозре, дондеже возгласиша родителя того прозревшаго ¹⁹ и вопросиша я, глаголюще: сей ли есть сын ваю, егоже вы глаголете, яко слеп родися? како убо ныне видит? ²⁰ Отвещаста (же) им родителя его и реста: вемы, яко сей есть сын наю и яко слеп родися: ²¹ како же ныне видит, не вемы, или кто отверзе ему очи, мы не вемы: сам возраст имать, самого вопросите, сам о себе да глаголет. ²² Сия рекоста родителя его, яко боястася жидов: уже бо бяху сложилися жидове, да, аще кто его исповесть Христа, отлучен от сонмища будет: ²³ сего ради родителя его рекоста, яко возраст имать, самого вопросите. ²⁴ Возгласиша же вторицею человека, иже бе слеп, и реша ему: даждь славу Богу: мы вемы, яко Человек сей грешен есть. ²⁵ Отвеща убо он и рече: аще грешен есть, не вем: едино вем, яко слеп бех, ныне же вижу. ²⁶ Реша же ему паки: что сотвори тебе? како отверзе очи твои? ²⁷ Отвеща им: рекох вам уже, и не слышасте: что паки хощете слышати? еда и вы ученицы его хощете быти? ²⁸ Они же укориша его и реша (ему): ты ученик еси того: мы же моисеовы есмы ученицы: ²⁹ мы вемы, яко моисеови глагола Бог, сего же не вемы, откуду есть. ³⁰ Отвеща человек и рече им: о сем бо дивно есть, яко вы не весте, откуду есть, и отверзе очи мои: ³¹ вемы же, яко грешники Бог не послушает, но аще кто Богочтец есть и волю его творит, того послушает: ³² от века несть слышано, яко кто отверзе очи слепу рождену: ³³ аще не бы был сей от Бога, не могл бы творити ничесоже. ³⁴ Отвещаша и реша ему: во гресех ты родился еси весь, и ты ли ны учиши? И изгнаша его вон. ³⁵ Услыша Иисус, яко изгнаша его вон, и обрет его, рече ему: ты веруеши ли в Сына Божия? ³⁶ Отвеща он и рече: и кто есть, Господи, да верую в него? ³⁷ Рече же ему Иисус: и видел еси его, и глаголяй с тобою той есть. ³⁸ Он же рече: верую, Господи. И поклонися ему. ³⁹ И рече Иисус: на суд аз в мир сей приидох, да невидящии видят, и видящии слепи будут. ⁴⁰ И слышаша от фарисей сия сущии с ним и реша ему: еда и мы слепи есмы? ⁴¹ Рече им Иисус: аще бысте слепи были, не бысте имели греха: ныне же глаголете, яко видим, грех убо ваш пребывает.