¹ И заповеда иосиф домостроителю своему, глаголя: наполните вретища мужем пищи, елико могут понести: и вложите комуждо сребро верху устия вретища: ² и чашу мою сребряную вложите во вретище меншаго, и цену пшеницы его. Бысть же по словеси иосифову, якоже рече. ³ Утро возсия, и мужие отпустишася сами, и ослята их. ⁴ Изшедше же они из града, не отидоша далече: и рече иосиф домостроителю своему: востав гони вслед мужей и постигни их, и рцы им: что яко воздасте (ми) злая за благая? ⁵ вскую украдосте чашу мою сребряну? не сия ли есть, из неяже пиет господин мой? он же и волхвованием волхвует в ней: злая совершисте, яже сотвористе. ⁶ Обрет же их, рече им по словесем сим. ⁷ Они же реша ему: вскую глаголет господин словеса сия? не буди рабом твоим сотворити по словеси сему: ⁸ аще сребро, еже обретохом во вретищах наших, возвратихом к тебе от земли ханаани, како быхом украли из дому господина твоего сребро или злато? ⁹ у негоже аще обрящеши чашу от раб твоих, да умрет: и мы будем раби господину нашему. ¹⁰ Он же рече: и ныне, якоже глаголете, тако будет: у негоже аще обрящется чаша, будет мой раб, вы же будете чисти. ¹¹ И потщашася, и сверже кийждо вретище свое на землю, и отверзоша кийждо вретище свое. ¹² Изыска же от старейшаго зачен, дондеже прииде до меншаго, и обрете чашу во вретищи вениамини. ¹³ И растерзаша ризы своя, и возложиша кийждо вретище свое на осля свое, и возвратишася во град. ¹⁴ Вниде же иуда и братия его ко иосифу, еще ему сущу ту, и падоша пред ним на землю. ¹⁵ Рече же им иосиф: что дело сие сотвористе? не ведасте ли, яко несть волхвователь человек, якоже аз? ¹⁶ Рече же иуда: что отвещаем господину, или что возглаголем, или чим оправдимся? Бог же обрете неправду рабов твоих: се, мы есмы раби господину нашему, и мы, и у негоже обретеся чаша. ¹⁷ Рече же иосиф: не буди ми сотворити глагол сей: муж, у негоже обретеся чаша, той будет ми раб: вы же поидите в целости ко отцу своему. ¹⁸ Приступив же к нему иуда, рече: молю тя, господине, да речет раб твой слово пред тобою, и не прогневайся на раба твоего, яко ты еси по фараоне: ¹⁹ господине, ты вопрошал еси рабов твоих, глаголя: аще имате отца, или брата? ²⁰ И рехом господину: есть нам отец стар, и отрочищь на старость менший ему, а брат его умре, он же един остася у матере своея, отец же возлюби его. ²¹ Ты же рекл еси рабом твоим: приведите его ко мне, да вижду его. ²² И рехом господину: не возможет отрочищь оставити отца своего: аще же оставит отца, умрет. ²³ Ты же рекл еси рабом твоим: аще не приидет брат ваш менший с вами, не приложите ктому видети лица моего. ²⁴ Бысть же егда приидохом к рабу твоему отцу нашему, поведахом ему словеса господина нашего, ²⁵ рече же нам отец наш: идите паки и купите нам мало пищи. ²⁶ Мы же рекохом: не возможем ити: но аще брат наш менший идет с нами, пойдем: ибо не возможем видети лице мужа, брату нашему меншему не сущу с нами. ²⁷ Рече же раб твой, отец наш к нам: вы весте, яко двоих роди мне жена: ²⁸ и отиде един от мене, и рекосте, яко зверем снеден бысть, и не видех его даже до ныне: ²⁹ аще убо поймете и сего от лица моего, и случится ему зло на пути, и сведете старость мою с печалию во ад. ³⁰ Ныне убо аще пойду к рабу твоему, отцу же нашему, и отрочища не будет с нами: (душа же его связана есть с душею сего,) ³¹ и будет егда увидит он не суща отрочища с нами, умрет: и сведут раби твои старость раба твоего, отца же нашего, с печалию во ад: ³² раб бо твой от отца взя отрочища, глаголя: аще не приведу его к тебе и поставлю его пред тобою, грешен буду ко отцу вся дни. ³³ Ныне убо пребуду тебе раб вместо отрочища, раб господину: отрочищь же да идет с братиею своею: ³⁴ како бо пойду ко отцу, отрочищу не сущу с нами? да не вижду злых, яже обрящут отца моего.