¹ Бысть же по словесех сих, согреши старейшина винарск царя египетска и старейшина житарск господину своему царю египетскому. ² И разгневася фараон на оба евнухи своя, на старейшину винарска и на старейшину житарска, ³ и вверже их в темницу во узилище, в место, идеже иосиф ввержен бяше. ⁴ И вручи их старейшина темницы иосифу, и предста им: и беста дни (некия) в темнице, ⁵ и видеста оба сон во едину нощь: видение же сонное старейшины винарска и старейшины житарска, иже беста царя египетска, суще в темнице, бяше сие. ⁶ Вниде же к ним иосиф заутра и виде их, и бяху смущени: ⁷ и вопрошаше евнухов фараоних, иже быша с ним в темнице, у господина своего, глаголя: что, яко лица ваша уныла днесь? ⁸ Они же реша ему: сон видехом, и разсуждаяй его несть. Рече же им иосиф: еда не Богом изявление их есть? поведите убо мне. ⁹ И поведа старейшина винарск сон свой иосифу и рече: во сне моем бяше виноград предо мною: ¹⁰ в винограде же три леторасли, и той цветущь произнесе отрасли, зрелы грозды лозныя: ¹¹ и чаша фараонова в руце моей: и взях грезн, и изжах оный в чашу, и дах чашу в руку фараоню. ¹² И рече ему иосиф: сие разсуждение сему: три леторасли три дни суть: ¹³ еще три дни, и помянет фараон сан твой, и паки поставит тя в старейшинство твое винарско, и подаси чашу фараону в руку его по сану твоему первому, якоже был еси виночерпчий: ¹⁴ но помяни мя тобою, егда благо ти будет, и сотвориши надо мною милость, и да помянеши о мне фараону, и изведеши мя от твердыни сея: ¹⁵ яко татьбою украден бых из земли еврейския, и зде ничто зло сотворих, но ввергоша мя в ров сей. ¹⁶ И виде старейшина житарск, яко прямо разсуди, и рече иосифу: и аз видех сон, и мняхся три кошницы хлебов держати на главе моей: ¹⁷ в кошнице же верхней от всех родов, яже фараон яст, дело хлебенное, и птицы небесныя ядяху тая от кошницы, яже на главе моей. ¹⁸ Отвещав же иосиф, рече ему: сие разсуждение его: три кошницы три дние суть: ¹⁹ еще три дние, и отимет фараон главу твою от тебе и повесит тя на древе, и изядят птицы небесныя плоть твою от тебе. ²⁰ Бысть же в день третий, день рождения бяше фараоня, и творяше пир всем отроком своим: и помяну старейшинство старейшины винарска и старейшинство старейшины житарска, посреде отрок своих: ²¹ и постави старейшину винарска в старейшинство его: и подаде чашу в руку фараоню: ²² старейшину же житарска повеси (на древе), якоже сказа има иосиф. ²³ И не помяну старейшина винарск иосифа, но забы его.