¹ И взыде иоанн от газаров и возвести симону отцу своему, яже сотвори кендевей. ² И призва симон два сыны своя старейшыя иуду и иоанна и рече има: аз и братия моя и дом отца моего поборахом враги израилевы от юности даже и до сего дне, и благопоспешествовася в руках наших избавити израиля многащи: ³ ныне же состарехся и вы милостию (Бога) доволни есте в летех: будите вместо мене и брата моего, и изшедше поборствуйте за язык наш, помощь же с небесе с вама да будет. ⁴ И избра от страны двадесять тысящ мужей военных и конников, и идоша на кендевеа и обнощеваша в модине. ⁵ И воставше заутра идоша на поле, и се, сила велия во сретение им, пешая и конная, и бе поток среде их. ⁶ И ополчися противу лица их сам и людие его: и виде люди боящыяся прейти поток и прейде первый, и видеша его мужие и преидоша вслед его. ⁷ И раздели людий и конников посреде пеших: конницы же врагов мнози зело. ⁸ И вострубиша трубами, и побежден бысть кендевей и полк его, и падоша от них язвени мнози: прочии же бегоша в твердыню. ⁹ Тогда уязвен бысть иуда брат иоаннов: иоанн же гна их, дондеже прииде в кедрон, егоже созда. ¹⁰ И побегоша даже до столпов сущих на селех азотских, и зажже его огнем, и падоша от них две тысящы мужей: и возвратися в землю иудину в мире. ¹¹ И птоломей сын авувов поставлен бысть воеводою в поли иерихона и имяше сребра и злата много: ¹² бе бо зять архиереов. ¹³ И вознесеся сердце его, и восхоте одержати страну, и помышляше лестно на симона и сынов его, погубити их. ¹⁴ Симон же прохождаше грады, яже во стране иудейстей, попечение имея о прилежании их, и сниде во иерихон сам и маттафиа, и иуда и сынове его, лета сто седмьдесят седмаго месяца первагонадесять, сей есть месяц сават. ¹⁵ И прия их сын авувов в твердыню, нарицаемую док, с лестию, юже созда, и сотвори им пир велик, и сокры тамо мужы. ¹⁶ И егда упися симон и сынове его, воста птоломей и иже с ним, и взяша оружия своя, и внидоша к симону на пир, и убиша его и два сына его и некиих от отрок его. ¹⁷ И сотвори прелесть велику во израили и воздаде злая за благая. ¹⁸ И писа сия птоломей и посла ко царю, да послет ему воев в помощь, и предаст ему страну их и грады. ¹⁹ И посла иныя в газару погубити иоанна, и тысящником посла послания, да приидут к нему, да даст им сребро и злато и дары. ²⁰ И иныя посла объяти Иерусалима и гору святилища. ²¹ И предтек некий возвести иоанну в газаре, яко погибе отец его и братия его, и яко посла и тебе убити. И слышав ужасеся зело. ²² И ят мужы, иже приидоша погубити его, и уби их: позна бо яко ищут его убити. ²³ И прочая словес иоанновых и браней его и благих мужеств его, имиже благомужествова, и созидания стен, ихже созда, и деяний его, ²⁴ се, сия писана суть в книзе дний архиерейства его, отнележе бысть архиерей по отце своем.