¹ Лета сто пятьдесят перваго, изыде димитрий селевкиев сын от рима, и взыде с малыми людьми во град приморский, и воцарися тамо. ² И бысть, егда вхождаше в дом царства отец своих, яша силы антиоха и лисию привести их к нему. ³ И уведана бысть ему вещь, и рече: не покажите ми лиц их. ⁴ И убиша их воини, и седе димитрий на престоле царства своего. ⁵ И приидоша к нему вси мужие беззаконнии и нечестивии от израиля, и алким предвождаше их, хотяй жречествовати: ⁶ и оклеветаша людий пред царем, глаголюще: погуби иуда и братия его всех другов твоих и нас расточи от земли нашея: ⁷ ныне убо посли мужа, емуже вериши, да идет и видит истребления вся, яже сотвори нам и стране царстей, и да мучит их и всех помогающих им. ⁸ И избра царь вакхида друга царска, иже господствоваше об ону страну реки, и великаго в царстве и верна цареви, ⁹ и посла его и алкима нечестиваго, и устави ему жречество, и повеле ему сотворити отмщение в сынех израилевых. ¹⁰ И отидоша и приидоша с силою велиею в землю иудину: и посла вестники ко иуде и братии его словесы мирными с лестию. ¹¹ И не вняша словесем их: видеша бо, яко приидоша с силою велиею. ¹² И собрашася ко алкиму и вакхиду собрания книжник изыскати праведная. ¹³ И первии асидее беху в сынех израилевых, и искаху от них мира. ¹⁴ Рекоша бо: человек жрец от семене аароня прииде в силах и не изобидит нас. ¹⁵ И глагола с ними словеса мирна и клятся им, глаголя: не воздам вам злая, ниже другом вашым. и вероваша ему. ¹⁶ И поима от них шестьдесят мужей и уби их во един день по словесех, якоже писано есть: ¹⁷ плоти преподобных твоих и крови их пролияша окрест Иерусалима, и не бе погребаяй их. ¹⁸ И нападе страх их и трепет на вся люди, яко рекоша: несть в них истины и суда: преступиша бо уставление и клятву, еюже кляшася. ¹⁹ И воздвижеся вакхид от Иерусалима и ополчися в визефе, и посла и ят многих отступивших от него мужей и некиих от людий, и закла их, (и) в кладязь велик (вверже): ²⁰ и вручи страну алкиму и остави силу в помощь ему: и отиде вакхид ко царю. ²¹ И подвизашеся алким о архиерействе. ²² И собрашася к нему вси возмущающии люди своя, и одержаша землю иудину, и сотвориша язву велику во израили. ²³ И виде иуда вся злая, яже сотвори алким, и иже с ним бяху, сыном израилевым паче языков. ²⁴ И изыде во вся пределы иудейския по окрест и сотвори отмщение на мужех отторгшихся, и престаша ходити во страну. ²⁵ Егда же увиде алким, яко укрепися иуда и иже с ним, и позна, яко не может противостояти им, и возвратися ко царю и оклевета их лукавне. ²⁶ И посла царь никанора, единаго от началник своих славных, и ненавидящаго и враждующаго на израиля, и повеле ему избити люди. ²⁷ И прииде никанор во Иерусалим с силою великою и посла ко иуде и братии его с лестию словесы мирными, глаголя: ²⁸ да не будет брань между мною и вами: прииду с мужы малыми, да вижду лица ваша с миром. ²⁹ И прииде ко иуде, и поздравляху друг друга мирно: и воини уготовани бяху восхитити иуду. ³⁰ И познася слово иуде, яко с лестию прииде к нему: и устрашися от него и не восхоте ктому видети лица его. ³¹ И позна никанор, яко открыся совет его, и изыде во сретение иуде бранию близ харфарсарама. ³² И падоша от сущих при никаноре яко пять тысящ мужей, и бежаша во град давидов. ³³ И по словесех сих взыде никанор на гору сион: и изыдоша от иереев от святых и от старейшин людских поздравити его мирно и показати ему всесожжение приносимое за царя. ³⁴ И поругася им и посмеяся им, и оскверни их и глагола гордо. ³⁵ И клятся с яростию, рекий: аще не предастся иуда и воини его в руки моя ныне, и будет, егда возвращуся в мире, сожгу храм сей. и изыде с яростию велиею. ³⁶ И внидоша жерцы и сташа пред лицем олтаря и храма и плачуще рекоша: ³⁷ ты, Господи, избрал еси храм сей, нарещися имени твоему в нем, да будет храм молитвы и прошения людем твоим: ³⁸ сотвори отмщение на человеце сем и на воех его, и да падут мечем: помяни хуления их и не даждь им обиталища. ³⁹ И изыде никанор от Иерусалима и ополчися в вефороне и срете его сила сирска. ⁴⁰ Иуда же приближися во адасу с тремя тысящьми мужей. и помолися иуда и рече: ⁴¹ иже послани бяху от царя ассирийскаго (сеннахирима), Господи, егда похулиша тя, изыде ангел твой и порази от них сто осмьдесят пять тысящ: ⁴² тако сокруши ополчение сие пред нами днесь, и да познают прочии, яко зло глагола на святая твоя, и суди ему по злобе его. ⁴³ И сотвориша воини брань в третийнадесять день месяца адара, и сотреся ополчение никанорово, и паде сам первый во брани. ⁴⁴ Егда же увидеша вои его, яко паде никанор, повергше оружия своя бежаша. ⁴⁵ И гнаша их путь дне единаго от адаса, дондеже приити в газир, и трубами трубиша вслед их со знаменами. ⁴⁶ И изыдоша от всех сел иудейских окрест и заключиша их рогами, и возвращахуся тии к ним и падоша вси мечем, и не оста от них ни един. ⁴⁷ И взяша корысти их и плен, и главу никанорову отсекоша, и десницу его, юже простре гордо, и принесоша и повесиша противу Иерусалима. ⁴⁸ И возвеселишася людие зело, и сотвориша день той день веселия великаго, ⁴⁹ и уставиша праздновати на всяко лето день той третийнадесять месяца адара. ⁵⁰ И умолче земля иудина на дни малы.