¹ И царь антиох прохождаше вышния страны и слыша, яко есть елимаис в персиде град славен богатством, сребром и златом, ² и храм в нем богат зело, и ту запоны златы, и броня и оружия, яже остави ту александр сын филиппов, царь македонский, иже царствова первый во еллинех. ³ И прииде и искаше взяти град и пленити его, и не возможе, яко познася слово сущым во граде. ⁴ И восташа противу ему на брань, и побеже оттуду, и иде со скорбию велиею, и возвратися в вавилон. ⁵ И прииде возвещаяй ему некто в персиду, яко отбегоша полцы ходившии во иудею. ⁶ И ходи лисиа с силою крепкою в первых, и прогнан бысть от лица их, и возмогоша оружиями и силами и корыстьми многими, яже взяша от полков, ихже избиша. ⁷ И разориша мерзость, юже созда на олтари во Иерусалиме, и святыню, якоже прежде окружиша стенами высокими, и вефсуру град его. ⁸ И бысть яко услыша царь словеса сия, устрашися и смутися зело: и паде на ложе и впаде в недуг от печали, понеже не сбыстся ему, якоже помышляше. ⁹ И бе ту дни многи, понеже обновися на нем печаль велика, и мняше, яко умрет. ¹⁰ И созва вся други своя и рече им: отиде сон от очию моею, и испадох сердцем от печали, ¹¹ и рех в сердцы моем: до коликия скорби доидох и волны велия, в нейже ныне есмь? яко благ и любимь бых во власти моей: ¹² ныне же поминаю злая, яже сотворих во Иерусалиме, и взях вся сосуды златы и сребряны в нем, и послах изяти обитающих во иудеи вотще: ¹³ познах убо, яко сих ради обретоша мя злая сия: и се, гибну скорбию велиею в земли чуждей. ¹⁴ И призва филиппа единаго от другов своих, и постави его над всем царством своим, ¹⁵ и даде ему диадиму и ризу свою и перстень, еже водити антиоха сына его и воспитати его еже царствовати. ¹⁶ И умре тамо антиох царь в лето сто четыредесять девятое. ¹⁷ И позна лисиа, яко умре царь. и постави царствовати антиоха сына его вместо его, егоже воспита юношу, и нарече имя ему евпатор. ¹⁸ И сущии во краеградии заключиша израиля окрест святых и искаху им злая всегда и утверждение языком. ¹⁹ И умысли иуда изгнати их: и созва вся люди, да обстоят их. ²⁰ И собрашася вкупе и обседоша их в лето сто пятьдесятое, и сотвори на них стрелостоятелницы и миханы. ²¹ И изыдоша от них из заключения, и прилепишася тем нецыи нечестивии от израиля, ²² и идоша ко царю и реша: доколе не сотвориши суда и отмстиши братию нашу? ²³ мы благоволим служити отцу твоему и ходити в заповедех его и последовати повелением его: ²⁴ и облежени суть во краеградии сынове людий наших, сего ради и отчуждаются от нас: и елицы обретахуся от нас, погубляхуся, и наследия наша расхищаема бяху: ²⁵ и не на нас токмо простроша руку, но и на вся пределы нашя: ²⁶ и се, ополчишася днесь на краеградие во Иерусалиме, еже взяти его и святыню, и вефсуру утвердиша: ²⁷ и аще не предвариши их скорее, болшая сих сотворят, и не возможеши удержати их. ²⁸ И прогневася царь, егда услыша, и собра вся други своя и началники силы своея и иже над конники: ²⁹ и от царств иных и от островов морских приидоша к нему силы наемницы: ³⁰ и бысть число сил его сто тысящ пешцев и двадесять тысящ конников, и слонов тридесять два ведящих брань. ³¹ И приидоша сквозе идумею и ополчишася в вефсуре, и ратоваху дни многи и сотвориша миханы: и изыдоша и пожгоша их огнем и бишася мужественне. ³² И отиде иуда от краеградия и ополчися в вефсахарии противу полка царева. ³³ И воста царь зело рано и воздвиже ополчение во устремлении его по пути вефсахарии: и устроишася силы на брань, и вострубиша трубами, ³⁴ и слоном показаша кровь гроздову и ягоды, еже поострити их на брань: ³⁵ и разлучиша зверей на полки и приставиша коемуждо слону тысящу мужей облеченных в броня железом соплетены, и шлемы медяни на главах их, и пять сот конников вчиненых коемуждо зверю избранных. ³⁶ Сия беша прежде времене, идеже аще бе зверь: и идеже аще идяше, идяху вкупе и не отступаху от него. ³⁷ И пирги древяни на них крепцы защищающии на коемждо звери, препоясани на нем миханами, и на коемждо мужей силы тридесять два воюющих на них, и индианин управитель его. ³⁸ И прочыя конники сюду и сюду поставиша на две части полка, побуждающе и заграждающе в дебрех. ³⁹ Егда же возсия солнце на щиты златыя и медяныя, обсияша горы от них и облисташа яко лампады огненныя. ⁴⁰ И отлучися часть некая от полка царева на горы высоки, и нецыи на нижшая, и идяху крепце и чинно. ⁴¹ И поколебашася вси слышащии глас множества их, и путьшествия многих, и сражения оружий: бе бо ополчение велико зело и крепко. ⁴² И приближися иуда и полк его на брань, и падоша от полка царева шесть сот мужей. ⁴³ И увиде елеазар сын саварань единаго от зверей облечена в броню царску, и бяше выше прочиих зверей, и возмнеся ему, яко на нем есть царь: ⁴⁴ и вдадеся сам еже избавити люди своя и сотворити себе имя вечное, ⁴⁵ и тече к нему с дерзостию в средину полка, и побиваше одесную и ошуюю, и разделяхуся от него сюду и сюду: ⁴⁶ и вниде под слона, и подложися ему, и уби его, и паде на землю верху его, и умре ту. ⁴⁷ И видеша силу царства и устремление воев, и уклонишася от них. ⁴⁸ Сущии же от полка царева взыдоша противу их на Иерусалим: и ополчися царь на иудею и на гору сион. ⁴⁹ И сотвори мир с сущими в вефсурех: и изыдоша из града, яко не бе им тамо пищи, еже затворитися в нем, понеже суббота бяше земли. ⁵⁰ И взя царь вефсуру и постави ту стражу хранити ю. ⁵¹ И ополчися на место святыни дни многи, и постави ту стрелостоятелницы и миханы, и огнеметницы и каменометницы и скорпионы, еже бы метати стрелы и пращы. ⁵² Сотвориша же и тии миханы противу михан их, и брашася дни многи. ⁵³ Пища же не бяше во граде, занеже седмое лето бе, и избежавшии во иудею от язык поядоша останок сокровения. ⁵⁴ И осташася во святилищи мужей мало, яко объят их глад, и расточени быша кийждо в место свое. ⁵⁵ И слыша лисиа, яко филипп, егоже постави царь антиох, еще жив сый, да воспитает антиоха сына его, во еже царствовати ему, ⁵⁶ возвратися от персиды и мидии, и вои царстии ходившии с ним, и яко ищет прияти вещы: ⁵⁷ и потщася поити от краеградия и глаголати ко царю и воеводам силы и к мужем: оскудеваем на всяк день, и пища нам мала (есть), и место, еже обстоим, утверждено, и надлежит нам (строити) яже о царстве: ⁵⁸ ныне убо дадим десницу человеком тем и сотворим с ними мир и со всеми людьми их, ⁵⁹ и уставим им, да ходят в законех своих, якоже прежде: ради бо законов своих, яже разрушихом, прогневашася и сотвориша вся сия. ⁶⁰ И угодно бысть слово пред царем и началники, и посла к ним мир сотворити. и прияша. ⁶¹ И клятся им царь и началницы: о сих изыдоша из твердыни. ⁶² И вниде царь в гору сион и виде твердыню места: и отвержеся клятвы, еюже клятся, и повеле разорити стену окрест. ⁶³ И отиде тщателно и возвратися во антиохию, и обрете филиппа господствующа над градом, и воева нань, и взя град нуждею.