¹ Во днех тех воста маттафиа сын иоаннов, сына симеоня, священник от сынов иоаривлих от Иерусалима, и седе во модине. ² И имяше сынов пять: иоанна, иже проименовашеся гаддис, ³ и симона, иже проименовашеся фассис, ⁴ иуду, иже звашеся маккавей, ⁵ елеазара, иже проименовашеся аваран, и ионафана, иже проименовашеся апфус. ⁶ И виде хуления бывающая во иудеи и во Иерусалиме, ⁷ и рече: увы мне! почто рожден есмь видети сотрение людий моих и сотрение града святаго, и седети зде, внегда предаватися ему в руце врагов и святыни в руки чуждих? ⁸ бысть храм его яко человек безчестен, ⁹ сосуды славы его пленени отнесени суть, побиени суть младенцы его на стогнах, и юношы его падоша мечем вражиим: ¹⁰ кий язык не наследова царства его и не одержа корыстей его? ¹¹ вся утварь его взята есть, вместо свободнаго бысть в раба: ¹² и се, святая наша и красота наша и слава наша опусте, и оскверниша я языцы: ¹³ почто убо нам еще жити? ¹⁴ И растерза ризы своя маттафиа и сынове его, и облекошася во вретища, и плакаша зело. ¹⁵ И приидоша от царя принуждающии ко отступлению во град модин, да пожрут. ¹⁶ И мнози от израиля приложишася к ним: маттафиа же и сынове его собрашася. ¹⁷ И отвещаша посланнии от царя и реша маттафии глаголюще: князь и преславный и велий еси во граде сем, и утвержден в сынех и братиих: ¹⁸ ныне убо приступи первый и сотвори повеление царево, якоже сотвориша вси языцы и мужие иудины и оставшии во Иерусалиме, и будеши ты и дом твой посреде другов царевых: и ты и сынове твои прославитеся в сребре и злате и в дарех мнозех. ¹⁹ И отвеща маттафиа и рече гласом велиим: аще и вси языцы в дому царствия царя слушают его, еже отступити комуждо от служения отец своих, и соизволиша в заповедех его: ²⁰ но аз и сынове мои и братия моя повинуемся закону отец наших: ²¹ милостив нам (буди, Боже), еже оставити закон и оправдания: ²² словес царевых не послушаем, еже преступити служение наше на десно или на шуее. ²³ И яко преста глаголати словеса сия, приступи муж иудеанин пред очима всех жрети в капищи, еже в модине, по повелению цареву. ²⁴ И виде маттафиа и возревнова, и вострепеташа внутренняя его, и возжжеся ярость его по суду (закона), и наскочив разсече его в капищи. ²⁵ И мужа, егоже царь посла, иже принуждаше жрети, уби во время оно и капище разори. ²⁶ И возревнова о законе, якоже же сотвори финеес замврию сыну саломлю. ²⁷ И возопи маттафиа во граде гласом велиим глаголя: всяк ревнуяй о законе и стояй в завете да изыдет вслед мене. ²⁸ И отбежа сам и сынове его в горы, и оставиша, елика имеяху во граде. ²⁹ Тогда снидоша мнози ищуще суда и правды в пустыню, ³⁰ и седоша ту сами, и сынове их и жены их, и скоти их, яко умножишася на них злая. ³¹ И возвещено бысть мужем царевым и силам, иже бяху во Иерусалиме граде давидове, яко отидоша мужие нецыи, иже разориша заповедь царску, в места тайная в пустыню. ³² И текоша вслед их мнози, и постигше их ополчишася на них, и составиша противу их брань в день субботный, ³³ и рекоша к ним: доныне доволно, изыдите и сотворите по слову цареву, и живи будете. ³⁴ И реша: не изыдем, ни сотворим по слову цареву, еже осквернити день субботный. ³⁵ И ускориша на них брань. ³⁶ И не отвещаша им, ниже камене вергоша на них, ниже заградиша мест тайных, рекуще: ³⁷ умрем вси в простоте нашей, свидетеле будут на нас небо и земля, яко неправо погубляете нас. ³⁸ И восташа на них в брани в субботы, и умроша сии и жены их, и сынове их и скоти их, даже до тысящи душ человек. ³⁹ И позна маттафиа и друзи его, и плакашася о них зело. ⁴⁰ И рече муж искреннему своему: аще вси сотворим, якоже братия наша сотвориша, и не воополчимся на языки о душах наших и оправданиих наших, ныне нас скоро искоренят от земли. ⁴¹ И умыслиша в день он глаголюще: всяк человек, иже аще приидет к нам на брань в день субботный, ополчимся противу его, и не умрем вси, якоже умроша братия наша в тайных. ⁴² Тогда собрася к ним сонмище иудейское крепцыи в силе от израиля, всяк соизволяяй закону: ⁴³ и вси иже бежаша от злых, приложишася им и быша им во утверждение. ⁴⁴ И собраша воев и побиша грешных во гневе своем и мужей беззаконных в ярости своей: прочии же бежаша во языки спастися. ⁴⁵ И обыде маттафиа и друзи его, и разориша капища, ⁴⁶ и обрезаша отроки необрезаныя, еликих обретоша в пределех израилевых в силе, ⁴⁷ и погнаша сынов гордыни, и успе дело в руку их: ⁴⁸ и удержаша закон от руки языков и от руки царей, и не даша рога грешнику. ⁴⁹ И приближишася дние маттафии умрети, и рече сыном своим: ныне укрепися гордыня и обличение, и время низвращения и гнев ярости: ⁵⁰ и ныне, чада, возревнуйте закону и дадите душы вашя за завет отцев наших. ⁵¹ Помяните дела отец наших яже сотвориша в родех своих, и приимете славу велию и имя вечное. ⁵² Авраам не во искушении ли обретен есть верен, и вменися ему в правду? ⁵³ Иосиф во время тесноты своея сохрани заповедь и бысть господин египту. ⁵⁴ Финеес отец наш внегда возревнова ревностию, прият завет священства вечнаго. ⁵⁵ Иисус, егда исполни слово, бысть судия во израили. ⁵⁶ Халев, егда засвидетелствова в Церкви, восприя земли наследие. ⁵⁷ Давид во своей милости наследова престол царствия во век века. ⁵⁸ Илиа, егда возревнова ревностию закона, взяся даже на небо. ⁵⁹ Ананиа, азариа, мисаил верующе спасошася от пламене. ⁶⁰ Даниил в простоте своей изятся от уст львовых. ⁶¹ И тако помышляйте по роду и роду, яко вси уповающии нань не изнемогут. ⁶² И от словес мужа грешна не убойтеся, понеже слава его в мотыла и в червие: ⁶³ днесь вознесется, а утре не обрящется, яко обратися в персть свою, и помышление его погибе. ⁶⁴ и вы, сынове, укрепитеся и мужайтеся в законе, яко в нем прославитеся. ⁶⁵ И се, симеон брат ваш, вем, яко муж совета есть, того послушайте вся дни, той будет вам во отца. ⁶⁶ И иуда маккавей, сей крепок в силе от юности своея, сей будет вам началник воинства и сотворит брань людем. ⁶⁷ И вы приведите к себе вся творцы закона и отмстите мщение людий ваших: ⁶⁸ воздайте воздаяние языком и внемлите в заповеди закона. ⁶⁹ И благослови их: и приложися ко отцем своим. ⁷⁰ И умре в лето сто четыредесять шестое: и погребоша его сынове его во гробех отец его в модине, и плакаша его весь израиль плачем велиим.