¹ Взыде вдыхаяй в лице твое, отемляй от оскорбления: усмотри путь, укрепи чресла, возмужай крепостию зело: ² понеже отврати Господь укоризну иаковлю, якоже укоризну израилеву: зане отрясающии отрясоша я и лозы их растлиша. ³ Оружия силы их от человек, мужы сильныя играющыя во огни: брозды колесниц их в день уготования его, и конницы возмятутся на путех, ⁴ и смятутся колесницы и сплетутся на стогнах: вид их яко свещы огненны, и яко молния протекающая. ⁵ И помянутся старейшины их, и побегнут в день, и изнемогут в пути своем, и потщатся на забрала его, и уготовят предния стражбы своя. ⁶ Врата градная отверзошася, и царства падоша, и имение открыся. ⁷ Сия же восхождаше, и рабыни ея ведяхуся, яко голубицы воркующя в сердцах своих: ⁸ и ниневиа, аки купель водная воды ея, и тии бежаще не сташа, и не бе взирающаго. ⁹ Расхищаху сребро, расхищаху злато, и не бяше конца имения ея: отяготишася паче всех сосудов вожделенная ея. ¹⁰ Истрясение и вострясение, и воскипение и сердца сокрушение, и разслабление колен и болезни по всем чреслом, и лице всех, аки опаление котла. ¹¹ Где есть виталище львов и пажить сущая львичищем? камо иде лев, еже влезти тамо львичищу, и не бяше устрашающаго. ¹² Лев восхити доволная львичищем своим и удави львицам своим, и наполни ловитвы гнездо свое и виталище свое похищения. ¹³ Се, аз на тя, глаголет Господь вседержитель, и пожгу дымом множество твое, и львы твоя пояст оружие: и потреблю от земли ловитву твою, и не услышатся ктому дела твоя.