¹ И опечалися иона печалию великою и смутися, ² и помолися ко Господу и рече: о Господи, не сия ли убо словеса моя, яже глаголах, еще сущу ми на земли моей? сего ради предварих бежати в фарсис, зане разумех, яко милостив ты еси и щедр, долготерпелив и многомилостив, и каяйся о злобах (человеческих): ³ и ныне, Владыко Господи, приими душу мою от мене, яко уне ми умрети, нежели жити. ⁴ И рече Господь ко ионе: аще зело опечалился еси ты? ⁵ И изыде иона из града и седе прямо града, и сотвори себе кущу и седяще под нею в сени, дондеже увидит, что будет граду. ⁶ И повеле Господь Бог тыкве, и возрасте над главою его, еже осенити его от злых его. И возрадовася иона о тыкве радостию великою. ⁷ И повеле Господь Бог червию раннему во утрие, и подяде тыкву, и изсше. ⁸ И бысть вкупе внегда возсияти солнцу, и повеле Бог ветру знойну жегущу, и порази солнце на главу ионину, и малодушствоваше и отрицашеся души своея и рече: ⁹ уне ми умрети, нежели жити. И рече Господь Бог ко ионе: зело ли опечалился еси ты о тыкве? И рече (иона): зело опечалихся аз даже до смерти. ¹⁰ И рече Господь: ты оскорбился еси о тыкве, о нейже не трудился еси, ни воскормил еси ея, яже родися об нощь и об нощь погибе: ¹¹ аз же не пощажду ли ниневии града великаго, в немже живут множайшии неже дванадесять тем человек, иже не познаша десницы своея, ниже шуйцы своея, и скоти их мнози?