¹ Слышите слово Господне, имже аз приемлю на вы плачь: дом израилев падеся и ктому не приложит востати: ² девица израилева повержена на земли своей, несть возставляющаго ю. ³ Понеже сия глаголет Господь Бог: из града, из негоже исхождаше тысяща, останется в нем сто: и из негоже исхождаше сто, останет в нем десять дому израилеву. ⁴ Понеже сия глаголет Господь к дому израилеву: взыщите мене и поживете: ⁵ а не взыскуйте вефиля и в галгалу не входите и ко кладязю клятвы не ходите, яко галгала пленяема пленится, и вефиль будет аки не быв. ⁶ Взыщите Господа и поживете, яко да не возжжется яко огнь дом иосифов, и пояст его, и не будет угашающаго дому израилева. ⁷ Господь творяй в высоту суд и правду на земли положи: ⁸ творяй вся и претворяяй, и обращаяй во утро сень смертную и день в нощь помрачаяй, призываяй воду морскую и разливаяй ю на лице земли: ⁹ Господь Бог вседержитель имя ему: разделяяй сокрушение на крепость и бедство на твердыню наводяй. ¹⁰ Возненавидеша у врат наказующаго, и словом праведным возгнушашася. ¹¹ Сего ради понеже пястьми биете убогих и дары избранны приясте от них: домы украшены соградисте, и не вселитеся в них, винограды вожделенны насадисте, и не имате пити вина от них. ¹² Яко уведех многа нечестия ваша, и крепцы греси ваши, попирающе праведнаго, приемлюще премены и убогия от врат отреяюще. ¹³ Сего ради смысляй в то время премолчит, яко время лукаво есть. ¹⁴ Взыщите добра, а не зла, яко да поживете, и будет тако с вами Господь Бог вседержитель, якоже ресте: ¹⁵ возненавидехом злая и возлюбихом добрая: и возставите у врат суд, яко да помилует Господь Бог вседержитель оставшая иосифова. ¹⁶ Сего ради сия глаголет Господь Бог вседержитель: на всех стогнах (будет) плачь, и на всех путех речется: увы люте, увы люте! призовется земледелец на плачь и на рыдание, и на ведящих плачь, ¹⁷ и на всех путех плачь, понеже пройду среде тебе, рече Господь. ¹⁸ Увы люте желающым дне Господня! вскую вам сей день Господень? сей бо есть тма, а не свет: ¹⁹ якоже аще убежит человек от лица льва, и нападет нань медведица: и вскочит в дом и опрется рукама своима о стену, и усекнет его змия. ²⁰ Несть ли день Господень тма, а не свет, и мгла не имущи света своего? ²¹ Возненавидех и отвергох праздники вашя и не обоняю жертв в сонмех ваших: ²² зане аще принесете ми всесожжения и жертвы вашя, не прииму, и на спасителная явления вашего не призрю. ²³ Отстави от мене глас песней твоих, и песни органов твоих не послушаю. ²⁴ И повалится якоже вода суд, и правда якоже водотеча непроходна. ²⁵ Еда заколения и требы принесосте ми в пустыни лет четыредесять, доме израилев? ²⁶ И восприясте скинию молохову и звезду бога вашего ремфана, образы, яже сотвористе себе. ²⁷ И преселю вы далее дамаска, глаголет Господь: Бог вседержитель имя ему.