¹ Заутра отвергошася, отвержеся царь израилев, понеже младенец израиль, и аз возлюбих его и из египта воззвах сына моего. ² Якоже призвах я, такожде отхождаху от лица моего: тии ваалиму требу жряху и изваяным кадяху. ³ Аз же связах ефрема, взях его на мышцу мою, и не разумеша, яко изцелих я. ⁴ Во истлении человечесте привлекох я узами любления моего, и буду им яко ударяяй человек по челюстем его: и воззрю к нему и премогу ему. ⁵ Вселися ефрем во египте, ассур же сам царь его, яко не восхоте возвратитися. ⁶ И изнеможе оружие во градех его, и умолче в руку его: и снедят от умышлений своих. ⁷ И людие его висяще от обитания своего: и Бог на честная его разгневается, и не вознесет его. ⁸ Что тя устрою, ефреме? защищу ли тя, израилю? что тя положу? Якоже адаму устрою тя, и якоже севоим, превратися сердце мое в нем, смятеся раскаяние мое. ⁹ Не сотворю по гневу ярости моея, не оставлю еже потребитися ефремови, зане Бог аз есмь, а не человек: в тебе свят, и не вниду во град. ¹⁰ Вслед Господа имам ходити: яко лев возревет, понеже той возревет, и ужаснутся чада вод, ¹¹ и приидут яко птица из египта и яко голубь от земли ассирски: и возставлю я в домех их, глаголет Господь. ¹² Обыде мя лжею ефрем, и нечестиями дом израилев и иуда: ныне позна я Бог, и людие святи прозвашася Богови.